फोन यायेवं तरकारी वइ
येँ (सन्ध्या टाइम्स)/येँ देशय् तरकारी आपूर्ति याइगु मुख्य लागा जुयाच्वंगु पालुङ तिस्टुङया किसानतय्सं आः बजारय् तरकारी मी हयेगु पलेसा स्वनिगःया छेँय् छेँय् हे वयाः तरकारी थ्यंका बीगु न्हूगु ग्वसाः दयेकूगु दु ।
स्थानीय नेवाः पुचः जानाः शुरु याःगु थ्व न्हूगु व्यवसायय् थुमिसं आःयात झिन्हुया छक्वः छेँय् छेँय् तरकारी थ्यंका बीगु ज्या यानाच्वंगु दु। खास यानाः च्यान्हु झिन्हु छेँय् तयातःसां छुं मजुइगु कथंया तरकारी थःत थुलि थुलि माल धकाः फोनपाखें अर्डर बियाछ्वत धाःसा उमिसं फुक्कं तरकारी छथाय् प्याक यानाः छेँय् हे थ्यंके हइ। थ्व तरकारी ताजा जुइगु जक मखु कि येँया तरकारी बजारय् स्वयां नं यक्व दनीगु खँ नं धाःगु दु ।
थ्व तरकारीया मेगु विशेषता छु धायेबलय् थुपिं विदेशी साः तयाः सिबें नं नेवाःतय् परम्परागत शैलीं पिनाः सयेका तःगु जुइ। खास यानाः नेवाःतय्सं नइगु तरकारीया मौलिक पुसा ल्यंका तयेगु ल्याखं नं थ्व पलाः छीत्यनागु खँ ग्वसाः पुचः मध्येया छम्ह भाजु इन्द्र श्रेष्ठं कनादीगु दु ।
थौंकन्हय् थःपिंसं येँया स्वीम्ह ग्राहकतय्थाय् थुकथं झिन्हुया छक्वः तरकारी थ्यंकाच्वनागु दुसां यदि ग्राहक अप्वया वन धाःसा झिन्हुया थासय् न्यान्हुइ छक्वः नं हये फइगु खँ वय्कलं कनादिल ।
इलय् ब्यलय् सतक बन्द जुइबलय् येँय् तरकारी वयेगु नं प्रभावित जू तर थ्व पुचः गांया लँपु जुयाः वयेगु जूगुलिं अज्याःगु बन्दय् नं तरकारी थ्यंकेगु खँ धाःगु दु। अथे हे उत्पादन अप्वः जुइबलय् गुलिं तरकारी निःशुल्क नं बी फइगु खँ नं धाःगु दु ।
