भारतीय सचिवं प्रम नापलात
येँ (सन्ध्या टाइम्स)/ नेपाःया निन्हुयंकंया भ्रमणय् वयाच्वंम्ह भारतीय विदेश सचिव अनुपमा रावं थौं सुथय् प्रधानमन्त्री माधव नेपालयात नापलानादिल ।
प्रम निवास बालुवाटारय् जूगु उगु खँल्हाबल्हाया झ्वलय् नेपालय् न्ह्यानाच्वंगु शान्ति प्रक्रिया व शान्ति सुरक्षाया बारे मय्जु रावं चिउताः प्वंकादीगु खःसा प्रम नेपालं शान्ति सुरक्षास्थिति सुधार जुया वनाच्वंगु जानकारी बियादीगु खः। लिसें प्रम नेपालं रावयात बागमति करिडोर याकनं दयेकेत इनाप यानादीगु खः ।
अथे हे वय्कःपिनि दथुइ प्रमया भारत भ्रमणया झ्वलय् जूगु ३४ बुँदे सहमतियात कार्यान्वयन यायेगु बारे नं खँल्हाबल्हा जूगु खः ।
विदेश सचिव रावं थःगु नेपाः भ्रमणया बारे थौं ३ बजे छगू पत्रकार सम्मेलन यानाः जानकारी बीगु ज्याझ्वः दु।
विदेश सचिव रावं थौं उपप्रधानमन्त्री विजयकुमार गच्छदार व गृहमन्त्री भीम रावलयात नं नापलानाः खँल्हाबल्हा यानादीगु ज्याझ्वः दु ।
