मुक्कं मिस्तय् सः दुथ्याःगु 'पासा'
येँ (सन्ध्या टाइम्स)/छम्ह कृषि विशेषज्ञ व समाजसेवी जुयाः नं रचना व गायन क्षेत्रय् थःगु हे प्रतिभा न्ह्यब्वयादीम्ह संगीतकार जीवनलाल मास्केया न्यागूगु पिथना कथं याकः संगीत दुथ्याःगु म्येँचाः 'पासा' शनिवाः वरिष्ठ गायक योगेश बैद्य व इमेज च्यानलया प्रबन्ध निर्देशक रघुवरभक्त मानन्धरं मंकाः रुपं विमोचन यानादिल ।
शिखर वित्तीय संस्थाया प्रमुख दुर्गामान श्रेष्ठया सभापतित्वय् जूगु विमोचन ज्याझ्वलय् ललिता मानन्धर, सुमित्रा महर्जन, दिपा महर्जन व रिता महर्जनपिंसं म्येँचाकय् दुथ्याःगु म्येँ न्यंकादीगु खः ।
मुक्कं झिंस्वम्ह मिसा कलाकारया सः दुथ्याःगु उगु म्येँचाकय् प्यम्ह मिसा कलाकार व प्यम्ह मिजं कलाकारतय्गु छपु पुचः म्येँ नं दुथ्यानाच्वंगु दु।
ज्याझ्वलय् पाहापिंपाखें गायक योगेश बैद्य, रघुवरभक्त मानन्धर, जीवनलाल मास्के व नरोत्तमलाल मास्केपिंसं न्ववानादीगु खः। थ्वयां न्ह्यः वय्कःया याकःसः दुथ्याःगु 'ईया इनाप' नापं 'छन्त जिं ययेकाच्वना', 'मतिनाया परिभाषा', 'छंगु जिगु संसार', व 'जिन्दगी' नांगु म्येँचाः पिदने धुंकूगु दु ।
