नेप्से ११ अंकं थहां वन
येँ (सन्ध्या टाइम्स)/वाणिज्य समुहया कारोबारय् वयाच्वंगु र्हासया लिसें लगातार कुहां वयाच्वंगु नेप्से परिसूचक थुगु समुहलय् वःगु सुधारया लिसें नेप्से नं थहां वनेगु क्रम शुरु जूगु दु। थुगु वाःया न्हापांगु न्हिया कारोबारय् सामान्य सुधार जुयाः ३ अंकं थहां वंगु नेप्से म्हिगः वाणिज्य बैंक समुहलय् वःगु सुधारया लिसें ११ दशमलव १ अंकं थहां वनाः ६२८ दशमलव ४४ अंकय् थ्यउंगु दु। सेन्सेटिभ नं सुधार जुयाः ३ दशमलव २५ अंकं थहां वंगु दुसा फ्लोट १ दशमलव १८ अंकं थहां वन ।
छन्हु न्ह्यः बजाः चालेवं कुहां वनेगु शुरु जूगु नेप्से परिसूचक म्हिगः धाःसा कारोबार शुरु जूगुयां बाघौ तक स्थिर जूगु खःसा वयां लिपा थहां वनेगु क्रमं गति काःगु खनेदत। म्हिगः वाणिज्य समुह १८ दशमलव ४१ अंकं सुधार जुयाः ६२५ दशमलव २९ अंकय् थ्यन। जलविद्युत समुह नं म्हिगः ८ दशमलव १७ अंकं थहां वनाः ८४३ दशमलव १८ अंकय् थ्यन। फाइनान्स समुह नं १ दशमलव ५३ अंकं थहां वनाः ६३८ दशमलव ७१ अंकय् थ्यंगु दु ।
मेखे म्हिगःया कारोबारय् मेमेगु विकास बैंकया शेयरय् सामान्य भाः थहां वंसां विजनेश डेभलपमेण्ट बैंकया शेयरय् प्रति कित्ता ३५९/-, एस डेभलपमेण्टया शेयरय् ३५/- व विराटलक्ष्मी विकास बैंकया शेयरय् ११/- तका कुहां वयेवं थुगु समुह कारोबार जूगु उपसूचकत मध्ये दकलय् अप्वः १७ दशमलव ३१ अंकं कुहां वनाः ६४८ दशमलव १ अंकय् थ्यन। अथे हे छन्हु न्ह्यः नं कुहां वंगु विमा समुह १ दशमलव १ अंकं कुहां वयाः ६२७ दशमलव ५८ अंकय् थ्यंगु दु ।
म्हिगः छन्हु न्ह्यःया स्वयां कारोबार कम्पनीया ल्याः लिसें दां व शेयर संख्या नं कुहां वल। छन्हु न्ह्यः न्हय्छगू कम्पनीया गुंगू लाख कित्तापाखें झिप्यंगू करोड तकाया कारोबार जूगु खःसा म्हिगः ख्वीस्वंगू कम्पनीया गुइगुद्वः निसः व गुइच्यागू कित्ता शेयर न्याये-मी जुयाः खुगू करोड न्यय्न्हय्गू लाख व न्हय्न्याद्वः तका दांया कारोबार जुल।
स्टायण्डर्ड चार्टर्ड, नेपाल एसबीआई, बैंक अफ काठमाण्डु, एभरेष्ट बैंक, एनईसी, नविल बैंक लगायत मेमेगु बैंकय् शेयरय् उल्लेख्य रुपं थहां वंगु दु ।
स्टायण्डर्ड चार्टर्डं म्हिगः दांया ल्याखं दकलय् अप्वः छगू करोड स्वीस्वंगू लाख व च्याद्वः तका दांया कारोबार याःगु दु। नेपाल इण्डष्ट्रियल एण्ड कमर्श बैंकं अप्वः कमे याःगु दुसा एस डेभलपमेण्ट बैंकं अप्वः गुमे याःगु दु ।
