नेपाःयात ग्वहालि यायेत दातृ निकायतय्त राष्ट्रपतिया इनाप
राष्ट्रपति डा. रामवरण यादवं नेपाःयात ग्वाहालि यायेत नेपालय् च्वंगु दातृ निकायतय्त इनाप यानादीगु दु ।
नेपालय् च्वंगु थीथी स्वीनिगू देय्या १८३ प्रतिनिधितय्सं ब्वतिकाःगु सामुदायिक वनया अन्तर्राष्ट्रिय गाष्ठीया उल्लेज्या यानादिसें राष्ट्रपति यादवं वनजंगलं कृषि, पर्यटन व उद्योग क्षेत्रय् ग्वाहालि जुयाच्वंगु तर गरिबी व अशिक्षाया कारणं तीव्र फडानी जूगु टिप्पणी यानादिसें नेपाःयात ग्वाहालि यायेत दातृ निकायतय्त इनाप यानादिल ।
पोखराय् मंगलवाः नं निसें न्ह्याःगु थुगु गोष्ठीइ राष्ट्रपति यादवं अन्तर्राष्ट्रिय स्तरया सामुदायिक वनया गोष्ठी यायेत ग्वाहालि यापिं दक्वं पक्षयात सुभाय् नं बियादलि ।
प्यन्हु तक न्ह्याइगु गोष्ठीलय् थीथी पीन्ह्यगू कार्यपत्र न्ह्यब्वइगु ज्याझ्वः दु । गाष्ठीइ नेपाः बाहेक ७६ म्ह विदेशी वन विज्ञतय्सं नं ब्वति कयाच्वंगु दु ।
थ्वहे दथुइ राष्ट्रपति, प्रधानमन्त्री व मन्त्रीतय् ज्याझ्वः बहिष्कार यानाः आन्दोलन यानाच्वंपिं एकीकृत नेकपा (माओवादी)या कार्यकर्तातय्सं कडा सुरक्षाया दथुइ नं राष्ट्रपति यादवयात पोखराय् हाकूगु ध्वाँय् क्यंगू दु । पोखराया विरौटा क्षेत्रय् प्रदर्शनकारीतय्सं हाकूगु ध्वाँय् क्यना: राष्ट्रपति व एमोल नेतृत्व सरकराया विरोधय् नाराबाजी याःगु खः ।
