संविधानसभा भंग जुइगु हल्ला जक : प्रधानमन्त्री
प्रधानमन्त्री माधवकुमार नेपालं संविधानसभा भंग जुइगु व देशय् सैनिक सर्वोच्चता कायम जुइगु हल्ला जक जूगुलिं उकीया ल्यूने मवनेत दक्वसितं इनाप यानादीगु दु ।
अन्तर्राष्ट्रिय लोकतन्त्र दिवसया लसताय् पूर्व सासंद क्लबं मंगलवाः येँय् 'राजनीतिक सहिष्णुता व लोकतन्त्र' विषयस ग्वसाःग्वःगु राष्ट्रिय सम्मेलनया उल्लेज्या यानादिसं प्रधानमन्त्री नेपालं जनआन्दोलनं प्राप्त लोकतन्त्रयात संस्थागत सुदृढीकरणया निंतिं सहमति व सहकार्य यानाः न्ह्याः वनेमाःगु बिचाः प्वंकादिल ।
वयेकलं लोकतान्त्रिक मूल्य व मान्यतायात आत्मासात यासें निषेधया राजनीतिक कासाः दिकेमाःगु व संसद सुचारु यायेमाःगु खँय् बः बियादिल । लोकतन्त्रया संस्थागत विकासया निंतिं शान्ति प्रकृयायात निष्कर्षय् थ्यंमाःगु व निर्धारित ईलय् हे संविधान निर्माण यायेगुया विकल्प मदुगु खँ प्रधानमन्त्री नेपालं धयादिल ।
ज्याझ्वलय् सभामुख सुवास नेम्वाङं लोकतन्त्रयात सिद्धान्तय् जक मखुसें व्यवहारय् नं लागू यानाः जनतायात प्रत्याभूति बीफूसाः जक स्थायी जुइगु बिचाः प्वंकादिल । लोकतन्त्रया आधार स्तम्भयात नेपालय् गुकथं पलिस्था यायेगु धइगु विषयलय् व्यापक सहलह यायेमाःगु खँ नं वयेकलं धयादिल ।
अथेहे परराष्ट्रमन्त्री सुजाता कोइरालां लोकतन्त्र विश्वया हे उत्कृष्ट व्यवस्था जूगु धयादिसें संसदीय व्यवस्था, बहुदलीय प्रतिस्पर्धा, मानव अधिकार, विधिया शासन, सुशासन थुकीया बांलागु पक्षत जूगु धयादिल ।
ज्याझवलय् संयुक्त राष्ट्रसंघीय विकास ज्याझ्वः(युएनडिपी)या नेपाःया निर्देशक एनी इशावेल ब्लेटुलं संयुक्त राष्ट्र संघया महासचिव वान कि मुनया सन्देश ब्वना न्यंकादीगु खः ।
संयुक्त राष्ट्र संघं २००७ सप्टेम्बर १५ तारिखयात अन्तर्राष्ट्रिय लोकतन्त्र दिवसया कथं हनेगु घोषणा याः कथं पूर्व सांसद क्लबं नेपालय् न्हापांगु अन्तर्राष्ट्रिय लोकतन्त्र दिवस न्यायेकूगु खः ।
