दमन यासाः प्रतिवाद यायेगु बादलया ख्याच्वः
एकीकृत नेकपा (माओवादी)या महासचिव रामबहादुर थापा 'बादलं' हाकूगु ध्वाँय् क्यनेगु झ्वलय् दमन यासाः उकीया कडा प्रतिवाद यायेगु ख्याच्वः बियादीगु दु ।
क्रान्तिकारी पत्रकार संघ मोरङं मंगलवाः विराटनगरय् याःगु पत्रकार सम्मेलनय् महासचिव बादलं दमन जुइसाः प्रतिरोध नं जुइगु प्रकृतिया अनिवार्य 'ल' जूगु टिप्पणी यानादिल । वयेकलं हाकूगु ध्वाँय् क्येनेगु ईलय् दमन जूसाः प्रतिरोध यायेत थपिं तयार जूगु धयादिल ।
वयेकलं धयादिल, - 'विराटनगरय् म्हिग (सोमवाः) झीगू कार्यकर्तातय्त दमन जूगु दु, थंज्याःगु घटनाक्रमं सरकारयात संकटय् लाकी ।'
माओवादीं न्यागू माग तयाः याःगु आन्दोलनं जनआन्दोलनया स्वरुप कयाच्वंगु नेता बादलं दाबी यानादिल । वयेकलं भिडन्त व हिंसां समस्याया समाधान मजूगु तर्क यानादिसें संसद व राजनीतिक सहमितं हे समस्याया हल जुइगु बिचाः प्वंकादिल ।
वयेकलं जनता व राष्ट्रया निंतिं न्हूगु मोर्चा आवश्यक जूगु धयादिसें उकीया निंतिं माओवादीं शान्तिपूर्ण आन्दोलन शुरु याःगु धयादिल ।
