वर्तमान सरकार संविधान निर्माणया बाधक : पोखरेल

एकीकृत नेकपा (माओवादी)या पोलिटब्यूरो दुजः लिलामणी पोखरेलं वर्तमान सरकार संविधान निर्माणया बाधक जूगु द्वपं बियादीगु दु ।

क्रान्तिकारी पत्रकार संघ कैलालीं धनगढीलय् ग्वसाःग्वःगु पत्रकार सम्मेलनय् न्ववानादिसें नेता पोखरेलं माओवादीया प्रमुख एजेण्डा प्रतिपक्षय् च्वनाः जुसां निर्धारित ईलय् संविधान निर्माण यायेगु जूगुलिं गु नं हालतं मोओवादीं संविधान निर्माण यानाः हे त्वःतिगु दाबी यानादिल ।

नेता पोखरेलं राष्ट्रपतिं संविधानय् मदुगु पलाः ल्ह्वना कार्यकारीणी अधिकार थःगु ल्हातये काःगुलिं माओवादी सतक आन्दोलनय् कुहांवयेमाःगु धयादिल । नेपाली कांग्रेस व एमाले विदेशीया इसाराय् न्ह्यानाच्वंगुलिं राष्ट्रपतिया विरुद्ध संसदय् संकल्प प्रस्ताव यंकेमब्यूगु धयादिसें पोखरेलं आः माओवादी जनतया बिच्चे वनाः संघर्ष याइगु धयादिल ।