विश्व आर्थिक मन्दी व नेपाःयात लिच्वः

विश्व हाकनं छक्वः आर्थिक सुनामीइ फँसे जूवंगु दु । खास यानाः अमेरिकाय् वःगु आर्थिक मन्दीया कारणं विश्व अर्थतन्त्रयात हे लिच्वः लाका यंकाच्वंगु दु । थुकिया लिच्वः कथं अमेरिकाय् शेयर बजाः डाँवाडोल जूवंगु दुसा गुलिखे बैंक ताथ जुइगु अवस्थाय् थ्यनेधुंकल । अमेरिकी सरकारं उकियात पनेत थम्हं फक्व ध्यबाया खुसिबाः पिकायेधुंकलं नं स्थिति वयागु नियन्त्रणय् वःगु मदुनि ।

अमेरिकी अर्थतन्त्रया थ्व डाँवाडोलं युरोपया बजाः स्यंकेधुंकूगु दुसा आः बुलुहुँ एशियाया शक्तिशाली अर्थतन्त्र दुगु देय्तय्त नं थीगु शुरु यानाहःगु दु । जापान दक्षिण कोरिया थेंज्याःगु देय्त थुिकं प्रभावित जुइधुंकूगु दुसा आः थ्व सुनामी भारतपाखे न्ह्याः वयाच्वंगु अर्थविद्तय्गु विश्लेषण दु ।

थ्वहे झ्वलय् थ्व आर्थिक मन्दीं नेपाः थेंज्याःगु चीधंगु अर्थतन्त्र दुगु देय्यात छु लिच्वः लाकी धकाः नं बिचाः शुरु यानाहःगु दु । धायेत ला नेपाः थेंज्याःगु देय्तय्त थुिकं लिच्वः लाकी मखु धकाः हे धायेगु यानाच्वंगु दु । अथे खःसां थःगु बजेटया अप्वः ब्व विदेशी ग्वाहालिइ निर्भर जुइमाःगु नेपाः थेंज्याःगु देतय्सं थम्हं दयेकातःगु बजेट तकं बांलाक धाने मफइगु अवस्था वइगु खने दु । आर्थिक मन्दीया कारणं नेपाःयात दातृ राष्ट्रतय्सं बी धकाः बचं बियातःगु ध्यबा तकं बी मफइगु अवस्था दु । थुिकं यानाः बजेटया कार्यक्रमत लागू याये फइ मखुसा उकिया लिच्वः समग्र विकासय् लाइगु निश्चित दु । उिकं थ्व आर्थिक मन्दीं नेपाःयात लिच्वः लाइ मखु धाःसां नं नेपाः थेंज्याःगु परनिर्भर अर्थतन्त्र दुगु देय्त सतर्क धाःसा जुइ हे माः ।

More Stories Like this