कोस्टारिकाय् नं १५ नेपाःमि ज्वन
येँ (सन्ध्या टाइम्स)/ मध्य अमेरिकी राष्ट्र कोस्टारिका जुयाः अमेरिका वनेत्यंपिं झिंन्याम्ह नेपाःमियात कोस्टारिका प्रहरीं ज्वंगु खँ अमेरिकी न्युज एजेन्सीं धाःगु दु।
झिंन्याम्ह नेपाःमिया लिसें पीन्हय्म्ह अफ्रिकन ज्यामितय्त नं ज्वंगु दु ।
कोस्टारिका सुरक्षा मन्त्रालयया प्रवक्ता सरजियो लोपेजयात उद्धृत यासें एपीं बिउगु जानकारी कथं स्वम्ह कोलम्बियाली नागरिकतय्सं उमित कोस्टारिकाया लँपु जुकाः अमेरिका यंकेत्यंगु खँ धाःगु दु ।
ज्वंपिं नेपाःमि व अफ्रिकन ज्यामितय् म्हय् लः म्हो जूगुलिं उमित हिरासतय् तयाः वासः यानाच्वंगु खँ नं लोपेजं धाःगु दु।
ज्वपिं मध्येया छम्ह नेपाःमिं धाः कथं थः दक्षिण अफ्रिका वयेगु निंतिं लछि तक भारतय् च्वनाः अनं लिपा अफ्रिका जुयाः डुंगाय् तयाः अमेरिकाय् यंकेत्यंगु खः ।
थ्व स्वयां छुं न्हि न्ह्यः जक अफ्रिकी मुलुक एल साल्डोभार जुयाः अमेरिकाय् यंकेत्यंपिं नीन्याम्ह नेपाःमियात अनया प्रहरीं ज्वंगु खः। उपिं नं अफ्रिकाया लँपु जुयाः हे डुंगाय् च्वनाः अमेरिका वनेत्यंपिं खः ।
