डाक्टर हडतालं अस्पताल ठप्प
येँ (सन्ध्या टाइम्स)/शिक्षण अस्पताल महाराजगञ्जया कर्मचारीतय्सं डाक्टरयात दुर्व्यवहार याःगु विरोधय् थौं डाक्टरतय्सं अनया आकस्मिक सेवा बाहेक मेगु फुक्कं ज्या ठप्प याना बिउगु दु ।
डाक्टरतय्सं उगु अस्पतालया एनेस्थेसिया विभागया प्रमुख डा. मोदनाथ मरहठ्ठायात अभद्र व्यवहार याःगु धासें अस्पतालया ज्या बन्द याःगु खः ।
उमिसं दोषीयात कारवाही यायेमाःगु, चिकित्सकतय् सुरक्षा जुइमाःगु माग न्ह्यःने हःगु दु ।
अस्पतालया ज्या ठप्प जूगुलिं वासः याकः वःपिं विरामीतय्त समस्या जुयाच्वंगु दुसा भर्ना जुयाच्वंपिं विरामीतय् नं वासः जुयाच्वंगु मदु। आन्दोलनरत डाक्टर व अस्पताल प्रशासनया दथुइ थौं वार्ताया कुतः जुयाच्वंगु दु।
थ्व स्वयां न्ह्यः डाक्टरतय्सं थः काय म्ह्याय्पिंत नं चिकित्साशास्त्र अध्ययन यायेगु निंतिं कोटा दयेमाःगु माग यासें आन्दोलन याना वयाच्वंगु खः ।
अन हे ज्या याइम्ह छम्ह पिउनया कायं शिक्षण अस्पतालया चिकित्सा अध्ययनय् छात्रवृत्ति चूलाकेवं डाक्टरतय्सं उम्ह पिउनया मचा विरुद्ध नं छगू कथं आन्दोलन यानाच्वंगु खँ धाःगु दु। उमिसं पिउनया मचां छात्रवृत्तिइ आखः ब्वने खनीगु तर थः मस्तय्सं धाःसा छाय् मखनीगु धासें आन्दोलन यानाच्वंगु खः ।
