भारतीय विदेश सचिव नेपालय्
येँ (सन्ध्या टाइम्स)/ परराष्ट्र सचिव ज्ञानचन्द्र आचार्यया ब्वनाय् भारतीय विदेश सचिव निरुपमा राव थौं नेपाः थ्यंकः वःगु दु ।
नेपाः थ्यनेवं वय्कलं परराष्ट्र सचिव लिसे सहलह यानादीगु खः। उगु इलय् वय्कःपिनि दथुइ नेपाः भारत सीमा विवाद, प्रमया भारत भ्रमणय् जूगु ३४ बुँदे सहमति कार्यान्वयन व वाणिज्य सन्धि नवीकरणया बारे नं सहलह जूगु खँ धाःगु दु।
भारतीय सचिव रावं थौं राष्ट्रपति, परराष्ट्रमन्त्री, कांग्रेस सभापति गिरिजाप्रसाद कोइराला व झलनाथ खनालयात नाप लाइगु ज्याझ्वः दुसा कन्हय् वय्कलं प्रधानमन्त्री माधव नेपाल, उपप्रधानमन्त्री विजय गच्छदार, गृहमन्त्री भीम रावलयात नं नाप लानादीगु ज्याझ्वः दु ।
