न्ह्यागुं भाय् 'सम्पर्क भाषा' जुइफु
येँ (सन्ध्या टाइम्स)/ सत्तारुढ पार्टी नेकपा (एमाले) या च्याक्वःगु महाधिवेशनं पारित याःगु राजनीतिक दस्तावेजय् खय् बाहेक मेमेगु भाषायात नं देय्या सम्पर्क भाषा दयेकेगु अवसर बीगु खँ न्ह्यथनातःगु दु। सरकारी ज्याखँया भाषा खस जूसां थुकिया नापनापं देय्या मेमेगु मांभाय्यात नं सम्पर्क भाय् जुइगु अवसर दइगु खँ उकी धयातःगु दु। खय् बाहेक मेमेगु भाय्यात नं सम्पर्क भाय्या रुपय् प्रयोग याना यंकेगु व्यवस्था यायेगु खँ दस्तावेजय् धयातःगु दु ।
थौंकन्हय् चर्चाय् वयाच्वंगु आत्मनिर्णयया अधिकारबारे नं च्याक्वःगु महाधिवेशनं अवधारणा तयार यानातःगु दु। पुलांगु सोभियत संघय् थें केन्द्रपाखें छुटे हे जुया वनेगु आत्मनिर्णयया अधिकार नेपाःया सन्दर्भय् पाय्छि जुइ मखु धासें अन्तर्राष्ट्रिय श्रम संगठनया अभिसन्धि - १६९ कथं या आत्मनिर्णयया अधिकार बीगु खँ उकी उल्लेख यानातःगु दु। उगु अभिसन्धिइ देय्या आदिवासी जनजातियात थःपिनि आर्थिक, सामाजिक, सांस्कृतिक विकास यायेत राज्यपाखें बीमाःगु सम्पूर्ण अधिकार बीमाःगु खँ न्ह्यथनातःसां बिस्कं मुलुक हे गठन यायेगु अधिकार धाःसा बियातःगु मदु ।
