येँय् च्वनाच्वंपिं टिष्टुङया नेवाःतय् मुँज्या
येँ (सन्ध्या टाइम्स)/ ऐतिहासिक नेवाः वस्ति टिष्टुङं येँय् वयाः थीथी पेशा व्यवसायय् संलग्न जुयाच्वंपिनि पुचः टिष्टुङ बज्रवाराही नेवाः पुचःया साधारण सभा शनिवाः यलया वादेय् क्वचाल ।
नरेश महर्जनं लसकुस यासें न्ह्याकूगु उगु ज्याझ्वलय् मूपाहां चन्द्रबहादुर गोपाली, पाहांपिं इन्द्रबहादुर बलामी, साईला बलामीपिंसं थःथःगु नुगःखँ प्वंकादीगु खः। साधारणसभाय् थीथी ज्याझ्वः यायेगु लिसें पुचःया वार्षिक व आर्थिक प्रतिवेदन नं पारित याःगु दु ।
अथे हे मुँज्यां नेवाः स्वायत्त प्राप्त यायेगु निंतिं जुइगु आन्दोलनय् ब्वति कायेगु निर्णययात नं सर्वसम्मतिं पारित यात ।
साधारणसभां विनोद महर्जनया अध्यक्षताय् झिंन्याम्ह दुजः दुगु न्हूगु ज्यासना पुचः नं स्वंगु दु ।
मेपिं पदाधिकारीत छसीकथं उपाध्यक्ष नरेश महर्जन, महासचिव राजन महर्जन, सचिव रविनभक्त श्रेष्ठ, कोषाध्यक्ष निशान महर्जन, सहकोषाध्यक्ष गोविन्द गोपाली व दुजलय् हरि गोपाल श्रेष्ठ, नारायण महर्जन, महेश्वर महर्जन, राजेन्द्र कपाली, सूर्जबहादुर श्रेष्ठ, इन्द्र बहादुर श्रेष्ठ, केशरमान बलामी, हरिचन्द्र गोपाली व प्रकाश महर्जनपिं च्वनादीगु दु।
मुँज्यां टिष्टुङय् एम्बुलेन्स सेवा तयेगु, थीथी विषयया जनचेतनामूलक ज्या यायेगु, उत्कृष्ट विद्यार्थीयात सम्मान व प्रोत्साहन यायेगु लिसें वृद्धवृद्धातय्त सम्मान यायेगु निर्णय नं याःगु दु ।
टिष्टुङया आपालं नेवाःत स्वनिगलय् वयाः च्वनाच्वंगु दुसा आः उमित थःपिनि संगठनय् संगठित यायेगु आज्जु संस्थां तयातःगु दु ।
