कारोबार लिसें नेप्सेय् सामान्य सुधार
येँ (सन्ध्या टाइम्स)/लगातार र्हास वयाच्वंगु नेप्से म्हिगः सामान्य सुधार जुयाः २ दशमलव ५५ अंकं थहां वनाः ६१७ दशमलव ३४ अंकय् थ्यंगु दु। सेन्सेटिभ नं शून्य दशमलव २६ अंकं थहां वंगु दुसा फ्लोट नं शून्य दशमलव शून्य ६ अंकं थहां वन ।
कारोबार शुरु जूगुया छुं ई लिपा हे कुहां वंगु नेप्से घौछि तक कुहां हे वनाच्वंगु खःसा वयां लिपा थुकिं गति कायेवं बजाः बन्द जूगु इलय् तकं निरन्तरता काल। यद्यपि बजाः बन्द जुइ स्वयां छुं ई न्ह्यः नेप्से परिसूचक कुहां वःगु खःसां लिपा हाकनं थहां वंगु खः ।
नेप्से उतार चढाव जुइगुलिं प्रमुख भूमिका दुगु वाणिज्य समुहया अन्तर्गतया कारोबारय् लगभग समानान्तर खनदयेवं स्टायण्डर्ड चार्टर्डया शेयरय् भाः थहां वनेवं थुगु समुह २ दशमलव २३ अंक थहां वनाः ६०६ दशमलव ८८ अंकय् थ्यन। अथे जलविद्युत समुह पाखे नं चिलिमे हाइड्रो पावरया शेयरय् प्रति कित्ता २०/- तका थहां वनेवं थुगु समुह ६ दशमलव ४५ अंकं थहां वनाः ८३५ दशमलव शून्य १ अंकय् थ्यंगु दु ।
मेखे म्हिगः नेप्सेय् जूगु मेमेगु उपसूचकया कारोबार धाःसा कुहां वःगु दु। दलकय् अप्वः विकास बैंक समुह ४ दशमलव ५८ अंकं कुहां वयेवं थुगु समुह ६६५ दशमलव ४१ अंकय् थ्यंगु दु। थ्वयां लिपा फाइनान्स समुह १ दशमलव १४ अंकं कुहां वयाः ६३७ दशमलव १८ अंकय् थ्यंगु दुसा वीमा समुह नं शून्य दशमलव ५२ अंकं कुहां वयाः ६२८ दशमलव ६८ अंकय् थ्यन ।
म्हिगःया कारोबारय् नेप्सेया लिसें कारोबार कम्पनी, शेयर संख्या व दामय् नं वृद्धि जूगु दु। ताः ई लिपा म्हिगः न्हय्छगू कम्पनीया गुंगू लाख झिंच्याद्वः सछि व चय्न्यागू कित्ता शेयरं झिंप्यंगू करोड गुइ स्वंगू लाख व गुइगुद्वः तका दांया कारोबार जुल ।
म्हिगः नेशनल हाइड्रो पावरया जक दकलय् अप्वः च्यागू लाख गुद्वः न्हय्सः व झिंव्यंगू कित्ता शेयर न्याये-मी जुल। आईएमई फाइनान्सियल इन्ष्टिच्यूशनया शेयरय् प्रति कित्ता ६९/- तका कुहां वंगु दु ।
नेशनल हाइड्रो पावरं दांया ल्याखं दकलय् अप्वः न्हय्गू करोड नीगू लाख व न्हय्निद्वः तका दां कारोबार याःगु दु। लुम्बिनी बैंक लिमिटेड दकलय् अप्वः कमे याःगु दुसा आईएमई फाइनान्सियल इन्ष्टिच्यूशनं अप्वः गुमे याःगु दु ।
