'शान्तिपूर्ण विरोध यायेगु अधिकार दक्वसिके दु'
समारोह स्थल पिने तनाव
प्रधानमन्त्री माधवकुमार नेपालं शान्तिपूर्ण विरोध यायेगु अधिकार दक्वसिके दुगु खँ धयादीगु दु ।
सोमवाः विराटनगरय् दुगु पूर्वाञ्चल विश्वविद्यालयया दिक्षाण्त समारोहलय् ब्वति कायेगु झ्वलय् माओवादी कार्यकर्तातय्सं यानाच्वंगु विरोधयात लक्षित यानादिसें प्रधानमन्त्री नेपालं शान्तिपूर्ण विरोध यायेगु अधिकार दक्वसिकें दुगु टिप्पणी यानादीगु ख: ।
दिक्षाण्त समारोहयात सम्बोधन यानादिसें प्रधानमन्त्री नेपालं दलत दथुइ द्वपं बीगू ज्या बन्द यानाः न्हूगु सहमतिया साथ न्ह्या वनेमाःगु खँ धयादिल । मुख्य दलत दथुइ न्हूगु सहमति कायम याये आवश्यक जूगु धयादिसें प्रधानमन्त्री नेपालं सहमति बिना सुनं याकचाः वनेत स्वेसा: दुर्भाग्यपूर्ण जुइगु धयादिल । वयेकलं सहमति, सहकार्य व सद्भावं जक राजनीतिक गतिरोधया निकास पिहांवइगुलिं सहमतिया लुखा चाःगु धयादिल ।
थ्वहे दथुइ पूर्वाञ्चल विश्वविद्यालयया दिक्षाण्त समारोह स्थल पिने तनाव जूगु दु । प्रधानमन्त्रीं ब्वति काःगु ज्याझ्वः बहिष्कार यायेगु झ्वलय् माओवादीं उगु ज्याझ्वलय् अवरोध थनेत स्वयेवं तनाव जूगु खः । माओवादीं दिक्षान्त समारोह जूगु विराटनगरया शहीद रंगशालाय् अवरोध यायेत स्वयेवं सशस्त्र व जनपथ प्रहरीं प्रदर्शनकारीतय्त लाठीचार्ज व अश्रुग्याँस क्येकूगु खः ।
तनाव लिपाः सुरक्षकर्मीतय्सं रंगशाला खाली याकूगु खसाः माओवादी अवरोधया कारणं ज्याझ्वः निर्धारित ई स्वयां स्वघौ लिपा जक न्ह्याःगु खः । रंगशासाय् सुरक्षाकर्मीतय्सं ब्वना पौ व परिचय पत्र स्वया: तिनि पाहंतय्त दुने वनेगु व्यवस्था मिलेयाःगु खसाः प्रधानमन्त्री नेपालं पूर्ण सुरक्षा व्यवस्था जुइधुंका तिनि ज्याझ्वलय् ब्वति कयादीगु खः ।
