भारतीय विदेश सचिव राव नेपालय्
भारतया विदेश सचिव निरुपमा रावं थःगु नेपाः भ्रमण निगू देया स्वापू सुधार यायेगु ज्याय् केन्द्रीत जुइगु खँ धयादीगु दु ।
विदेश सचिवय् नियुक्त जुइधुंकाः न्हापांगु पटक नेपाःया निन्हुन्यंकया भ्रमणया निंतिं सोमवाः येँय् थ्यंकादिम्ह विदेश सचिव रावं विमानस्थलय् संचारकर्मीतय्त संक्षिप्त प्रतिक्रिया बियादिसें थःगु न्हापांगु भ्रमण स्वापू विस्तारय् केन्द्रीत जुइगु धयादिल ।
त्रिभुवन अन्तर्राष्ट्रिय विमानस्थलय् भारतीय विदेश सचिव राव यात नेपाःया परराष्ट्रसचिव ज्ञानचन्द्र आचार्यं लसकुस यानादीगु खः ।
नेपाःया निन्हुन्यंया भ्रमणया झ्वलय् विदेश सचिव रावं राष्ट्रपति डा. रामवरण यादव, प्रधानमन्त्री माधवकुमार नेपाल, उपप्रधानमन्त्री विजयकुमार गच्छदार, परराष्ट्रमन्त्री सुजाता कोइराला नापं थीथी राजनीतिक दलया शीर्ष नेतातय्त नापलानादीगु ज्याझ्वः दु ।
