माओवादीं पार्टीत तछ्यायेत स्वयाच्वंगु महतया द्वपं
कांग्रेसया सहमहामन्त्री डा. रामशरण महतं एकीकृत नेकपा (माओवादीं) पार्टीत तछ्यायेगु ज्याय् लगे जुयाच्वंगु द्वपं बियादीगु दु ।
सुनसरीया इटहरीलय् सोमवाः प्रेस युनियन सुनसरी शाखां याःगु पत्रकार सम्मेलनय् महतं माओवादीं पार्टीत तछ्यायेगु कुतः याना: न्ह्याम्हेसित नं प्रधानमन्त्री जुइत प्रस्ताव यानाच्वंगु धयादिल । वयेकलं कांग्रेस नेतृ सुजाता कोइरालायात माओवादीं प्रधानमन्त्रीया निंतिं प्रस्ताव याःगु धका पिहांवयाच्वंगु बुखँ प्रति लक्षित यानादिसें धयादिल, - 'माओवादीं धायेवं कांग्रेस वर्तमान सरकारया विकल्पय् मेगू सरकार निर्माण यायेगु पाखे वनीमखु ।'
वयेकलं माओवादीं लोकतन्त्रया अपव्याख्या यासें संविधान निर्माण यायेगु ज्याय् जटिलता उन्तन्न यानाच्वंगु धयादिल । लोकतन्त्रया उपहास यानाः एक दलीयता लादे यायेत स्वसाः थःपिंत मान्य मजुइगु धयादिसें नेता महतं ईलय् हे संविधान निर्माण जुइमाः धायेवं गलत संविधानय् कांग्रेसं हस्ताक्षर यायेमफइगु स्पष्ट यानादिल ।
नेता महतं माओवादीं सहमति व सहकार्यया लँपू बन्द यानाः सतकय् आन्दोलन यानाच्वंगु धयादिसें सहमतिया विकल्प मदुगु धयादिल । वयेकलं संसदय् राष्ट्रपति नं ल्ह्वंगु पलाया बारे मखसें राष्ट्रपति व प्रधानमन्त्रीं छु छु ज्या यायेदइगु धइगु विषयलय् सहलह यायेफइगु धयादिल ।
