'गतिरोध अन्त्यया निंतिं न्यागू विकल्प'
नेपाली कांग्रेसया सहमहामन्त्री अर्जुननरिसंह केसीं वर्तमान राजनीतिक गतिरोध अन्त्यया निंतिं न्यागू विकल्पत न्ह्यने सारे यानादीगु दु ।
रिपोर्टर्स क्लब नेपालं आइतवाः येँय् याःगु साक्षात्कार ज्याझ्लवय् कांग्रेसया सहमहामन्त्री केसीं राष्ट्रपतियात महाअभियोग, प्रधानमन्त्रीयात अविश्वासया प्रस्ताव, सैनिक ऐन संशोधन, नागरिक सर्वोच्चताया निंतिं दलतय् सहमतिलय् न्हूगु प्रस्ताव, राष्ट्रपति व प्रधानमन्त्रीया अधिकारबारे संबिधान संशोधनया प्रस्ताव ह्येत एकीकृत नेकपा (माओवादी)यात इनाप यानादिल ।
वयेकलं माओवादी सहमति याये चाहेजुसाः थुपिं न्यागू विकल्पत पाखें निकास मालेमाः धयादिसें संकल्प प्रस्तावया बारे धासाः कांग्रेस छुं नं हालतं सहलह यायेत तयार मजुइगु धयादिल । वयेकलं वर्तमान सरकारया विकल्प मदुगु धयादिसें संविधान निर्माण व शान्ति प्रकृया पूमवंतल्ले थःगु पार्टीं सरकारया विकल्प ममालीगु धयादिल ।
ज्याझ्वलय् माओवादीया प्रवक्त दिनानाथ शर्मा नागरिक सर्वोच्चता व राष्ट्रपतिया पलाःया बारे संकल्प प्रस्तावय् सहलह यायेत संसदया छु नियामावली व ऐनं रोके लगेयाःगु दु धकाः न्ह्यसः तयादिल ।
वयेकलं सभामुखं कांग्रेस व एमालेया दबावय् संपल्प प्रस्तावय् सहलह यायेत रोक लगे याःगु द्वपं बियादिल । थ्व सरकारं अधिनायकवाद व निरंकुशता लादे यायेत स्वयाच्वंगु धयादिसें उकीया विरुद्ध माओवादीं सतक व संसद ठप्प यानाः सरकारयात बर्खास्त यायेगु ख्याच्वः तकं बियादिल ।
माओवादी वार्ता यानाः सहमति मालेत न्ह्यावलें नं तयार जूगु धयादिसें नेता शर्मां यदि समस्याया समाधन चाहे जूसाः प्रधानमन्त्रीं ठोस प्रस्ताव ज्वनाः वयेमाः धयादिल ।
एमाले स्थायी समिति दुजः भरतमोहन अधिकारीं निर्धारित ईलय् संविधान जारी मजूसाः देय् दुर्घटनाय् लाइगु ख्याच्वः बियादिल । वयेकलं मोहनिया लसताय दक्वं दलया शीर्ष नेतातय्सं ईलय् हे संविधान निर्माण यायेगु सन्देश जनतायात बीमाः धयादिल ।
अथेहे राष्ट्रिय जनशक्ति पार्टीया सहअध्यक्ष प्रकाशचन्द्र लोहनीं संविधान निर्माण यायेगु ज्याय् लगेमजुसें नेतात वाणी युद्धय् तक्यनाच्वंगु द्वपं बियादिल । वयेकलं सभामुखं छक्वः अस्विकार यायेधुंकूगु प्रस्तावयात संसदय् प्रवेश याये मिलेमजूगु धयादिसें राष्ट्रपतिया पलाःया बारे संसदय् छुं नं हालतं सहलह यायेमफइगु धयादिल ।
