राष्ट्रिय सरकारं जक जनतायात राहत बीफइ : शेरचन
प्रमुख प्रतिपक्षी दल एकीकृत नेकपा (माओवादी)या स्थायी कमिटी दुजः अमिक शेरचनं राष्ट्रिय सहमतिया सरकारं जक जनतायात राहत बीफइगु खँ धयादीगु दु ।
माओवादीं झापाया सदरमुकाम चन्द्रगढीलय् आइतवाः याःगु जनसभायात सम्बोधन यानादिसें नेता शेरचनं माओवादी नेतृत्वया राष्ट्रिय सरकार गठन मजूतल्ले नेपाली जनतां राहतया अनुभूति यायेमफइगु दाबी यानादिल ।
वयेकलं विदेशीया इशारय् चलेजुइगु सरकारं राष्ट्रियतया पक्षय् ज्या यायेमफइगु धयादिसें वैदेशिक हस्तक्षेप विरुद्ध प्रतिकार यायेत दक्वं जनतायात ल्वाभः चले यायेगु तालिम बीमाः धयादिल ।
जनसभायात सम्बोधन यानादिसें मेम्ह स्थायी कमिटी दुजः टोपबहादुर रायमाझीं सेनापति प्रकरणय् राष्ट्रपतिं ल्हवंगु असंवैधानिक पलाः भिंकेगू ज्या मजूसाः जनविद्रोह यायेगु ख्याच्वः बियादिल । वयेकलं राष्ट्रपति डा. रामवरण यादवं गणतन्त्र नेपाःया ज्ञानेन्द्र जुइगु कुचेष्टा यानाच्वंगु द्वपं नं बियादिल । वयेकलं जनकुखी संविधान निर्माण व शान्ति प्रकृया तार्किक निष्कर्षय् थ्यंकेत माओवादीया कुतःयात मेमेगू संसदवादी दलतय्सं अवरोध यानाच्वंगु धयादिल ।
