स्वशासन मबिउसा देय् कुचा जुइ
राष्ट्रिय योजना आयोगया पुलांम्ह उपाध्यक्ष व सभासद् प्रा. डा. मंगलसिद्धि मानन्धरं यदि आःया इलय् नं जातीय स्वशासन मबिल धाःसा देश कुचा दलेफुगु खँ कनादीगु दु । म्हिगः थनया लाय्कुली पीन्यागूगु विराट नेपालभाषा साहित्य सम्मेलनया झ्वलय् जूगु संघीय लोकतान्त्रिक गणतन्त्र व नेवाः राज्यु विषयक ज्याझ्वलय् न्ववासें थ्व खँ कनादीगु खः । वय्कलं धयादिल-आत्मनिर्णयया अधिकार सहितया जातीय स्वशासनं देय् कुचा दली मखु बरु स्वशासन मंत धाःसा देय् कुचा दलेफु ।
नेवाः देय् दबूया नायः मल्ल के. सुन्दरं जातीय स्वशासनया आधारय् भूमिपुत्रतय्त स्थान मबिल धाःसा थन द्वन्द्व अन्त्य जुइ फइमखु धयादिल ।
विराट गुथिया नायः त्रिरत्न शाक्यया सभापतित्वय् जूगु उगु प्रवचन ज्याझ्वलय् नेपाः राष्ट्रिय पार्टीया सभासद् बुद्ध साय्मि डा. चुन्दा बज्राचार्य डा. महेशमान श्रेष्ठिपंसं जातीय स्वशासन कायम जुइमाःगु खँय् बः बियादीगु खः । विराटया दुजः हिरण्यप्रताप सांगामिया लसकुस न्वचुं शुरु जूगु ज्याझ्वलय् नेपाल साहित्य मन्दिरया नायः व साहित्यकार तिलकप्रकाश कायस्थं थगुने न्हाप लिउ व लियांलिउ लाःगु सांस्कृतिक पुचःत छसिकथं स्टुडेण्ट एकेडमी नेवाः हिउपाः खलः व इमेज स्कूलयात विराट सांस्कृतिक सिरपाः लःल्हानादीगु खः ।
