नेप्से छवाःया दुने ४८ अंकं क्वय
येँ (सन्ध्या टाइम्स)/नेप्सेय् थ्व वालय् न्यान्हुयंकं कारोबार जूगु दु। न्यान्हुया कारोबारय् नेप्सेय् थ्वःया न्हापांगु न्हि ६६२ दशमलव ५७ अंकं शुरु जूगु कारोबार लिपांगु न्हि ४७ दशमलव ७८ अंकं र्हास वयाः बजाः बन्द जुल ।
छवाः न्ह्यः प्यन्हु जक कारोबार जूगु खःसा थ्व वालय् न्यान्हुया दुने गुइगू कम्पनीया हे ५६११ कारोबारं न्हय्गू लाख चय्गुद्वः व खुसः कित्ता शेयर न्याये-मी जूगु दु। थ्व ल्याखं छवाःया दुने मुक्कं चय्प्यंगू करोड स्वीच्यागू लाख गुइद्वः तका दांया कारोबार जूगु दु ।
थ्वयां छवाः न्ह्यःया वालय् ४३७४ कारोबारं प्यंगू लाख ख्वीखुद्वः व स्वसः कित्ता शेयर न्याये-मी जुयाः स्वीप्यंगू करोड न्यय्प्यंगू लाख स्वीस्वद्वः तका दांया कारोबार जूगु खः।
दांया ल्याखं थ्व वालय् छवाः न्ह्यःया कारोबारय् स्वयां ४० दशमलव ०८ प्रतिशतं थहां वंगु दु ।
'क' वर्गया कारोबार मापन याइगु सेन्सेटिभ इन्डेक्स नं न्हापांगु न्हिया तुलनाय् १६ दशमलव ४३ अंकं कुहां वयाः लिपांगु न्हि १५७ दशमलव ४२ अंकय् थ्यन ।
थ्व वालय् 'क' वर्गय् लाःगु कम्पनीया जक स्वीप्यंगू करोड नीछगू लाख तका दांया कारोबार जुल। 'क' वर्गया कारोबारया ल्याखं थ्व वालय् नेप्सेय् जूगु कूल कारोबारया ७० दशमलव ७१ प्रतिशत खः ।
थ्व वालय् कारोबार याःगु कम्पनीत मध्ये दांया ल्याखं दकलय् अप्वः खुगू करोड न्हय्च्यागू लाख तका कारोबार याःगु नविल बैंक, दकलय् अप्वः छगू लाख व स्वीन्याद्वः कित्ता शेयर कारोबार जूगु ल्याखं स्टायण्डर्ड फाइनान्स व प्यसः व न्हय्गू कारोबार याःगु ल्याखं सिटिजन्स इन्टरनेशनल बैंक अग्रस्थानय् लाःवःगु दु ।
