आन्दोलन त्वःता सहमतिलय् वयेत माओवादीयात प्रमया इनाप
प्रधानमन्त्री माधवकुमार नेपालं नागरिक सर्वोच्चताया नामय् सतकय् आन्दोलन यानाच्वंगु एकीकृत नेकपा (माओवादी)यात सहमतिलय् वयेत इनाप यानादीगु दु । वयेकलं समस्याया समाधान सहमति व सहकार्य जूगुलिं सतकय् आन्दोलन याये त्व:ता सहमतिलय् वयेत माओवादीयात इनाप यानादिल ।
आइतवाः भरतपुरय् उच्च माध्यमिक विद्यालय संघ नेपाल हिसानया न्हापांगु राष्ट्रिय सम्मेलनया उल्लेज्या यानादिसें प्रधानमन्त्री नेपालं माओवादीं मेमेगू राजनीतिक दलं थःत छखे त्येत स्वःगु धकाः यानाच्वंगु प्रचार प्रति आपत्ति प्वंकादिसें दक्वं दलत छप्पं जुया न्ह्याः वनेमाःगु खँय् बः बयादिल । वयेकलं सेना समायोजनया निंतिं ज्या न्ह्यायेधुंकूगुलिं इलय् हे सेना समायोजन जुइगु धयादिल ।
'न्हूगु नेपाल, न्हूगु संविधान, शिक्षाय् निजी क्षेत्रया समुचित स्थान' धकाः नारा बियाः न्ह्याःगु सम्मेलनय् प्रधानमन्त्री नेपालं शिक्षायात व्यापारया कथं कायेमज्यूगु धयादिसें शैक्षिक संस्थायात शान्ति क्षेत्र दयेकेत शैक्षिक संस्थाय् बन्द हड्ताल न्ह्यवलेंया निंतिं बन्द यायेमाःगु आवश्यक जूगु बिचाः प्वंकादिल ।
थ्वस्वयां न्ह्यः थीथी ज्याझ्वलय् ब्वति कायेत चितवन थ्यंकादिम्ह प्रधानमन्त्री नेपाल भरतपुर विमानस्थलया मू लुखां पिहांमवंसे हाकूगु ध्वाँय् क्यनेत च्वनाच्वंपिं माओवादीया कार्यकर्तातय्त मदुगु ल्यूनेया लुखां पिहांझायादीगु ख: ।
माओवादीया कार्यकर्तातय्सं भरतपुरं नारायणगढ थ्यंकेगु झ्वलय् अवरोध याइगु सम्भावना खनेवं सुरक्षाकर्मीतय्सं प्रधानमन्त्रीयात ल्यूनेया लुखां पिनेयंकूगु खः । रुट परिवर्तन यानाः पिहांवंसां माओवादी कार्यकर्तातय्सं प्रधानमन्त्रीया थाय् थासय् हाकूगु ध्वाँय् क्यंगु खः । वयेक चितवन वइगु जूगुलिं आइतवाः चितवनया सुरक्षा व्यवस्था तसंक क्वातुगु खः ।
