अर्थमन्त्रीयात अप्पां क्येकल
ज्याझ्वलय् ब्वति मकासें येँय् लिहांझाल
अर्थमन्त्री सुरेन्द्र पाण्डेयात माओवादीया कार्यकर्तातय्सं शनिवाः पोखराय् अप्पां क्येकूगु दु ।
'गोल्डेन न्यूज' न्हि पौया विमोचन यायेत पोखराया चिप्लेढुंगा थ्यंकादिम्ह मन्त्री पाण्डेयात माओवादीया कार्यकर्तातय्सं हाकूगु ध्वाँय् क्यनाः अप्पां क्येकूगु खः । अप्पां लानाः मन्त्री सवार ग. १. झ. १. नम्बरया गाडी व स्कर्टिङ यानाच्वंगु गाडीलय् क्षति जूगु दु । प्रदर्शनकारीतय्सं क्येकूगु अप्पा मन्त्री सवार गाडी दुने हे दुहावःगु खसां मन्त्री पाण्डेयात धासाः अप्पां मलाःगु जानकारी सुरक्षाकर्मीं ब्यूगु दु ।
चिप्लेढुंगा थ्यनेवं मन्त्री विरुद्ध नारावाजी व अप्पां क्येकेवं मन्त्री पाण्डेयात वहे गाडी तयाः तप्यंक विमानस्थल यंकूगु खः । असुरक्षाया कारणं ज्याझ्वलय् ब्वति मकासें मन्त्री पाण्डे येँय् लिहांझायादीगु दु ।
येँ लिहांझाये न्ह्यः विमानस्थलय् संचारकर्मीतय्त संक्षिप्त प्रतिकृया बियादिसें मन्त्री पाण्डें कमजोर सुरक्षा अवस्था व थःयात अप्पां क्येकूगु बारे मन्त्रिपरिषद, सुरक्षा निकायया प्रमुखत व पार्टीया उच्च तहलय् खँल्हाबंला यायेगु कनादिल ।
माओवादीं नागरिक सर्वोच्चताया माग यासें यानाच्वंगु आन्दोलनया झ्वलय् राष्ट्रपति निसें प्रधानमन्त्री व मन्त्रिपरिषदया दुजःतय् ज्याझ्वः बहिष्कार यायेगु व हाकूगु ध्वाँय् क्येनाः विरोध यानावयाच्वंगु दु ।
