सहमतिया आधारय् सरकारया नेतृत्व माओवादीं नं यायेफइ : पोखरेल
नेकपा (एमाले)या महासचिव इश्वर पोखरेलं राजनीतिक दलतय् सहमतिया आधारय् एकीकृत नेकपा (माओवादीं) नं सरकारया नेतृत्व यायेफइगु खँ धयादीगु दु ।
एमाले जिल्ला कमिटी मकवानपुरया अधिवेशनया उल्लेज्या यानादिसें महासचिव पोखरेलं दलतय् सहमतिलय् माओवादीया नेतृत्व स्वीकार यायेत छुं समस्या मदुगु धयादिसें तत्काल मन्त्रिपरिषदय् ब्वति कायेत माओवादीयात इनाप यानादिल । वयेकलं धयादिल, - 'दक्वं दलया सहमति ज्वनाः वइसाः जिमित वयाः (माओवादी) नेतृत्व नं स्वीकार दु ।'
वयेकलं यदि राजनीतिक दलतय् सहमति ज्वना वयेमफुसाः थ्वहे मन्त्रिमण्डलय् सम्मानजनक सिट बीत वर्तमान सरकार तयार दुगु धयादिल ।
माओवादीं थःगु हे कारणं सरकार त्वतेमाःगु धयादिसें नेता पोखरेलं संविधान निर्माणया निंतिं ग्वाहालि यायेत माओवादीयात इनाप यानादिल । अझ नं दक्षिणपन्थीत संविधान दयेके मबीत स्वाच्वंगुलिं थुकी दक्वं पक्ष सर्तक जुइमाःगु बिचाः नं नेता पोखरेलं प्वंकादिल ।
