संघीयताया आन्दोलन विरोधी षडयन्त्र जुयाच्वंगु द्वपं
संघीय लिम्बुवान राज्य परिषदं सरकारं विशेष सुरक्षा योजनाया नांमय् संघीयताया आन्दोलन विरोधी षडयन्त्र यानाच्वंगु द्वपं ब्यूगु दु ।
पूर्वया गुंगू जिल्लायात लिम्वुवान क्षेत्र घोषणा यायेमाःगु व न्हूगु संघीय व्यवस्था जातीय आधारय् जुइमाःगु माग यानाः आन्दोलन यानाच्वंगु परिषदं शनिवाः सुनसरीया धरानय् याःगु बृहत आमसभाय् सरकारं सुरक्षा नीति लितः मकासाः गम्भीर दुर्घटना जुइगु ख्याच्वः ब्यूगु दु ।
सभायात सम्बोधन यासें परिषदया अध्यक्ष कुमार लिङ्देनं संघीयता विरुद्ध सुनां नं आन्दोलन यायेत स्वसाः उकीया विरुद्ध थःपिसं संघर्ष यायेगु ख्याच्वः बियादिल ।
आमसभायात परिषदया केन्द्रिय महासचिव सुर्य माखिम, धिमाल स्वायत्त राज्य परिषदया संयोजक बान्गे धिमाल, याक्खा स्वायत्त राज्य परिषदया संयोजक निङलाहाङ याक्खा लगायत वक्तातय्सं सम्बोधन यानादीगु ख: ।
