सरकार क्वथलेगु बिचाः मयायेत प्रधानमन्त्रीया इनाप
प्रधानमन्त्री माधवकुमार नेपालं वर्तमान सरकार क्वथलेगु धकाः बिचाः मयायेत माओवादीयात इनाप यानादीगु दु ।
शनिवाः येँय् कन्या मोर्डन क्याम्पसं याःगु छगू ज्याझ्वलय् न्ववानादिसें प्रधानमन्त्री नेपालं थ्वहे सरकारं शान्ति प्रकृयायात तार्किक निष्कर्षय् थ्यंका न्हूगु संविधान निर्माण याइगुलिं सरकार क्वथेलगु बिचाः मयायेत इनाप यानादिल ।
प्रधानमन्त्री नेपालं माओवादी अध्यक्ष पुष्पकमल दाहाल 'प्रचण्ड'या लिप्पांगु अभिव्यक्ति असभ्यताया पराकाष्ठा जूगु टिप्पणी यानादिल । वयेकलं असभ्य बिचाः दुगुलिं हे माओवादी अध्यक्ष पाखें लिप्पांगु ईलय् अज्याःगु अभिव्यक्ति वःगु धयादिल ।
माओवादी प्रति तसकं आक्राशित खनेदुम्ह प्रधानमन्त्री नेपालं ज्याझ्वलय् न्ववायेगु झ्वलय् अधिकाशं ई माओवादीयात असभ्य जूगु धकाः टिप्पणी यानादिल । वयेकलं माओवादीयात सुसंस्कृत व सभ्य दयेकेत दक्वस्यां कुतः यायेमाःगु बिचाः नं प्वंकादिल ।
माओवादीलय् सैन्य सोच हावी जूगु धयादिसें प्रधानमन्त्री नेपालं उमिगु बिचाः व व्यवहारय् रुपान्तरण आवश्यक जूगु धयादिल । वयेकलं माओवादीयात सैन्य मानसिकता त्याग यानाः सेना समायोजनय् ग्वाहालि यायेत नं इनाप यानादिल ।
