'तःधंगु दलत दथुइ सहकार्यया विकल्प मदु'
अर्थमन्त्री सुरेन्द्र पाण्डें माओवादीयात छखे तयाः देशय् निकास पिहांमवइगु खँ धयादीगु दु ।
शनिवाः नेकपा (एमाले) चितवन जिल्लया न्ह्यक्वःगु अधिवेशनया बन्द सत्रया झ्वलय् भरतपुरय् जूगु ज्याझ्वलय् न्ववानादिसें मन्त्री पाण्डें तःधंगु दलत दथुइ सहकार्यया विकल्प मदुगु धयादिसें माओवादीयात थःगु हठ त्याग यानाः मेमेगू दलनाप सहकार्य यानाः वनेत इनाप यानादिल ।
वयेकलं वर्तमान सरकारया विकल्प मदुगु धयादिसें थ्व सरकार छुं नं हालतं क्वमदलीगु दाबी यानादिल । वयेकलं न्हूगु संविधान निमार्ण एमाले नेतृत्वया सरकारं हे याइगु धयादिल । वर्तमान सरकार राष्ट्रिय सहमतिया सरकरा जूगुलिं थुकी माओवादी नं ब्वति कयाः न्हूगु संविधान निर्माण यायेत ग्वाहालि यायेमाःगु बिचाः प्वंकादिल ।
असोज दुने संसदया अवरोध हटे जुया विनियोजन विधयेकय् सहलह जुइगु विश्वास प्वंकादिसें मन्त्री पाण्डें माओवादीं थुकी सकारान्मक संकेत क्यंगु धयादिल । वयेकलं भदौ २० दुने थ्व सरकारं न्हापाया सरकारया तुलनाय् अधिक राजस्व संकलन यानाः २० अर्ब मुंकूगु दाबी नं यानादिल ।
