'थ्व: स्वक्वःगु जनआन्दोलनया तयारी जक खः'

'राष्टपति महोदय! जुजु जुइगु मुर्खता कृपया यानादिमते'

एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' माओवादीं नागरिक सर्वोच्चतया निंतिं आः सुरु याःगु आन्दोलन स्वक्वःगु जनआन्दोलनया पूर्व तयारी जक जूगु खँ धयादीगु दु ।

शुक्रवाः येँया खुल्लामञ्चय् राष्ट्रिय संयुक्त जनआन्दोलन समिति अन्तर्गत नेवाः राज्य समितिं याःगु विरोध सभायात सम्बोधन यानादिसें वयेकलं माओवादीं न्ह्यने सारे याःगु पीगू सुत्रिय माग हे आः हिलावंगु परिस्थितिइ पीन्यागू सूत्रिय मागया रुपय् न्ह्यने सारे यानाः आन्दोलन यानाःगु धयादिल ।

वयेकलं थःगु पार्टीया छुं नेतातय्सं स्वक्वःगु जनआन्दोलन सुरु जुल धासां वयेकलं थ्व ऐतिहासिक प्याखंया ट्रेलर जक जूगु धयादिल । वयेकलं 'थ्व आन्दोलन मेमेगू दलयात खबरदारी जक खः' धयादिल ।

नेपाली कांग्रेसया नेतातय्सं माओवादीया नेतातय् जेलय् कुनेमाःगु धापू प्रति आपत्ति प्वंकूसें वयेकमं माओवादी नेतातय्त जेलय् कुनेत हाथ्या बियादिल । वयेकलं धयादिल, - 'जेलय् वनिपिं सु खः ? जनतां त्याकाः छ्वपिं वनीगु की कायर, लुटेरात, सुनां देयायात थुगु हालतय् थ्यंकल ?'

माओवादी अध्यक्ष प्रचण्डं जुजुया न्ह्यने विन्ति पत्र बीगू बानी जुइधुंकूपिं नेतातय्सं राष्ट्रपतियात बिन्ति पत्र बियाः वयेकयात जुजु दयेकेगु कुतः याःगु धयादिल । वयेकलं धयादिल, - 'प्रधानमन्त्री पद व नेपाली जनताया हत्या यायेत विन्ति यायेत जुजुया न्ह्यने पुलिंचुइगु बानी जुइधुंकुपिंसं राष्ट्रपतियात जुजु दयेकेत स्वयाच्वंगु दु ।'

वयेकलं राष्ट्रपतियात इनाप यासें धयादिल, - 'राष्टपति महोदय रामवरण यादव जी! जुजु जुइगु मुर्खता कृपया यानादिमते ।'

वर्तमान सरकार, प्रधानमन्त्री माधवकुमार नेपाल व मन्त्रीत विदेशी प्रभूतय्त न्ह्यनय् बिन्ति यानाः सरकारय् वंगु द्वपं बियादिल । वयेकलं थ्व सरकार जनातां तिरस्कृत प्रधानमन्त्री व मन्त्रीत जूगु धयादिसें बूपिनि बहुमत दुगु सरकार धकाः टिप्पणी यानादिल ।

वयेकलं नेपाली सेनाय् न्हापांम्ह जनजाति सेनापति वःगु धायदिसें सेनाय् छम्ह निम्ह बाहेक मेपिं लोकतान्त्रिकरण जुइधुंकूगु धयादिल । वयेकलं आः सेना व प्रहरीं न्हापाया जुजुया पाले थें मजुसें जनताया आदेश पालना याइगु धयादिल ।

स्वनिगःया थीथी थासं पिहांवःगु माओवादीया जुलुस खुल्लामञ्चय् मुनाः सभाय् हिउगु खः । जुलुसया कारणं स्वनिगःया ट्राफिक तसकं अस्थव्यस्त जूगु खः ।