माओवादीयात छखे तया: संविधान निर्माण यायेफइमखु : वामदेव
नेकपा (एमाले)या उपाध्यक्ष वामदेव गौतमं माओवादीयात छखे तयाः न्हूगु संविधान निर्माण यायेमफइगु खँ धयादीगु दु ।
एमाले दाङया झिक्वःगु अधिवेशनया उल्लेज्या यानादिसें उपाध्यक्ष गौतमं संविधान सभाय् माओवादी दकलय् तःधंगु दल जूगुलिं माओवादीयात याकचाः तयाः संविधान निर्माण जुइमफइगु दाबी यानादिल । संविधान जारी यायेगु ईलय् दुई तिहाइ मत आवश्यक जुइगुलिं माओवादीत नं नापं यंकेमाः धयादिल ।
आःया च्यालाः दुने न्हूगु संविधान निर्माण मजुसाः देय् संविधान विहीन जुइगु धयादिसें गौतमं अथेमजुसाः देशय् गृहयुद्ध तंक जुइफुगु धयादिल । वर्तमान सरकारयात संविधान निर्माण यायेत ध्यान बीत नं वेयकलं इनाप यानादिल । एमालेया नेता गौतमं ईलय् हे संविधान निर्माण यायेगु ज्या व शान्ति प्रकृयायात निष्कर्षय् थ्यंकेमफुसाः उकीया जिम्मेवार धकाः एमालेया छ्यँनय् लाइगु धयादिल ।
अथेहे ज्याझ्वलय् एमाले सचिव नापं सूचना व संचारमन्त्री शंकर पोखरेलं जनतां ल्यःगु सर्वोच्चता स्वीकार यायेत माओवादीयात इनाप यानादिल । सतक आन्दोलनं जनताया सर्वोच्चता स्थापित मजुइगु धयादिसें मन्त्री पोखरेलं संसदय् बहुमत क्यनेत माओवादीयात हाथ्या बियादिल ।
शुक्रवाः हे एमाले चितवनया न्ह्यक्वःगु अधिवेशनया उल्लेज्या यानादिसें एमालेया महासचिव ईश्वर पोखरेलं दलत दथुइ खनेदुगु तिक्ततां विश्वासया संकट खनेदुगु धयादिसें दलत दथुइया ध्रुविकरण अन्त्य यायेमाः धयादिल ।
