हानं मन्त्रीमण्डल विस्तार

प्रधानमन्त्री माधवकुमार नेपालं शुक्रवाः हानं छक्वः मन्त्रीमण्डल विस्तार यानादीगु दु । थ्व नापं प्रधानमन्त्रीं मन्त्रीमण्डलया विस्तार यानादीगु ल्या: च्याक्वःगु पटक थ्यंगु दु । शुक्रवाः तराई-मधेश लोकतान्त्रिक पार्टीया निम्ह नेतातय्त मन्त्रीमण्डलय् दुथ्याकूगु खः ।

तमलोपा पाखें गोविन्द चौधरीयात शिक्षा राज्यमन्त्री व चन्दा चौधरीयात युवा व खेलकुद सहायक मन्त्री नियुक्त याःगु दु । मन्त्री नियुक्त जुयादिपिं निम्ह मन्त्रीतय्सं शुक्रवाः राष्ट्रिय योजना आयोगया हलय् सपथ कायादीगु खः । निम्हं मन्त्रीतय्सं हिन्दी भासं सपथ काःगु खः ।

समानुपातिकं निर्वाचित जुयादिपिं तमलोपाया निम्ह नेतात मन्त्री जुइवं मन्त्रीमण्डलय् तमलोपाया पाखें मन्त्रीतय् ल्याः खुम्ह थ्यंगु दुसाः मन्त्रीमण्डलया ल्याः धासाः पीपिम्ह थ्यंगु दु ।