प्रधामन्त्री नेपालयात सम्मान
स्वास्थ्य अवस्था गम्भीर जुया सीत्यम्ह रुकुमया कमला चन्दयात बचे यानादिम्ह प्रधानमन्त्री माधवकुमार नेपालयात सम्मान याःगु दु ।
शुक्रवाः सुथय् बालुवाटारय् याःगु छगू ज्याझ्वलय् स्वास्थ्यया निंतिं खाद्यान्न नांया संस्थां प्रधानमन्त्री नेपालयात सम्मान याःगु खः । प्रधानमन्त्री नेपालं सुदूर पश्चिमाञ्चलया भीमदत्त नगरय् मंगलवाः क्वचाःगु समारोहलय् ब्वति कयाः नेपालगञ्ज जुया बुधवाः थः गयाजूगु हेलिकप्टर ज्वनाः स्वास्थ्य अवस्था गम्भीर जुम्ह चन्दयात येँ हयाः वसाः याकूगु खः । मन्त्रिपरिषदया बैठक तकं स्थगित यानाः छम्ह साधारण नागरिकया ज्यान बचे याःगुलिं प्रधानमन्त्री नेपालयात सम्मानित याःगु खः ।
उगु ज्याझ्वलय् प्रधानमन्त्री नेपालं ग्रामीण क्षेत्रया बासिन्दा बिरमी जूगु ईलय् वासः वकेत हवाई एम्बुलेन्सया आवश्यकता दुगु धयादिल । वयेकलं हवाई एम्बुलेन्सया निंतिं ग्वाहालि यायेत अन्तर्राष्ट्रिय समुदाय नाप इनाप यायेगु नं धयादिल ।
