नेपाल संवत् बारे सरकारी अध्ययन
संस्कृति तथा राज्य पुनर्संरचना मन्त्री गोपाल किराँतीं नेपाल संवतयात व्यवहारिक प्रयोग नापं कानुनी मान्यता बीकेगु बारे मन्त्रालयं अध्ययन यायेगु खँ कनादीगु दु ।
राष्ट्रिय विभूति शंखधर साख्वाः प्रतिष्ठानया प्रतिनिधि मण्डलं बिउगु ज्ञापनपत्र लःल्हाना कासें वय्कलं थुकिया निंतिं विज्ञतलिसे सहलह यायेगु खँ कनादीगु खः । नेपाल संवत् व राजना लिपि राष्ट्र संघय् दुथ्याःगु खँ कुलादिसें वय्कलं नेपाल संवत् नेपाःया राष्ट्रिय संवत् जुइमाः धयादिल ।
प्रतिष्ठानं लःल्हाःगु ज्ञापनपत्रय् नेपाल संवत्यात व्यवहारय् छ्यलेमाःगु नेपाल संवत्या प्रवर्तक शंखधर साख्वाःया झ्वाताय् नेपाल संवत्या हरेक न्हूदँय् स्वां देछायेगु व्यवस्था यायेमाःगु शंखधर साख्वाः बारे पाठ्यसफुली दुथ्याकेमाःगु व न्हूगु संविधानय् संवत् नीति स्पष्ट यायेमाःगु माग यानातःगु दु । थ्व माग बारे थम्हं मन्त्रिपरिषद् बैठकय् खँ तयेगु आश्वासन मन्त्री किराँतीं बियादिल । ज्ञापनपत्र बीत प्रतिष्ठानया नायः मदनकृष्ण श्रेष्ठ न्वकु राजेन्द्रमान श्रेष्ठ छ्यांज्ये श्यामकृष्ण मानन्धर लिउ छ्यांज्ये ज्ञानराम श्रेष्ठ दांभरि चन्दनकृष्ण श्रेष्ठ आदिपिं झाःगु खः ।
