२४ सै घण्टा ज्या याःसा संविधान वयेफु
येँ (सन्ध्या टाइम्स)/संविधानसभा संवैधानिक समितिया सभापति निलाम्बर आचार्यं मू राजनीतिक दलत छथाय् वयेफत धाःसा इलय् हे संविधान दयेके फइगु खँ धयादीगु दु।
म्हिगः बहनी बीबीसी नेपाली सेवालिसे खँ ल्हासें वय्कं ल्यं दनिगु च्यालाया दुने संविधान दयेकेत न्हिछिया निप्यघौ हे ज्या यायेमाःगु खँ नं कनादीगु दु ।
वय्कलं संविधान निर्माणया ईयात प्रतिस्पर्धा व दाउपेचय् खर्च मयायेत सुझाव बियादिसें लिपांगु इलय् वयाः मू राजनीतिक दलतय् दथुइ सहमति जुइ फइगु संकेत खनेदुगु खँ नं धयादीगु दु ।
लडाकु व्यवस्थापन व सेना समायोजन समितिं ज्या न्ह्याकेधुंकूगु व राजनीतिक दलतय् दथुइ नं उच्चस्तरं खँ जुयाच्वंगुलिं सकारात्मक वातावरण बने जुयाच्वंगु खँ कनादीगु दु। वय्कलं मुख्य दलतय् दथुइ सहमति मजुइगु खःसा न्ह्याक्व हे समय तालिका हिउसां इलय् संविधान दयेके मफइगु बिचाः नं प्वंकादिल ।
संविधानसभाया राज्य पुनर्संरचना व राज्यशक्ति बाँडफाँड, शासकीय स्वरुप निर्धारण, मौलिक अधिकार तथा राज्यया निर्देशक सिद्धान्त, प्राकृतिक श्रोत, आर्थिक अधिकार व राजस्व बाँडफाँड समितिं अझ नं थःपिनि अवधारणा तयार मयाःनि ।
