नेपाःया टापु गामय् स्वाइन फ्लु
येँ (सन्ध्या टाइम्स)/ विश्वय् महामारीया रुपय् न्यना वनाच्वंगु स्वाइन फ्लु नेपाःया टापु गां धयातःगु कञ्चनपुरया चाँदनी दोधाराय् छम्हेसिके लूगु दु ।
चाँदनी गाविस ७ या देवसिंह कुंवर स्वाइन फ्लुं ग्रस्त जुयाः मुम्बई जुयाः नेपाः वःगु आशंकाय् अनया स्थानीय जनताय् थुकथं त्रास ब्वलंगु खः। कुंवर बुधवाः जक भारतं लिहां वःगु खः ।
मुम्बइनं लिहां वसांनिसें कुंवरयाके सेखं चाइगु, गःपः स्याइगु व ज्वर वइगु लक्षण खने दयेवं मनूत वयागु छेँया न्ह्यःने जुयाः वनेगु तकं त्वःतूगु खः। कुंवरयात स्वाइन फ्लु जूगु आशंकाय् वयागु छेँय् न्ह्यःनेसं दुगु महाकाली आदर्श माध्यमिक विद्यालयया विद्यार्थीत तकं स्कुल वयेगु त्वःतूगु दु। विद्यार्थीत स्कुल मवयेवं स्कूल हे बन्द यायेमाःगु दु।
अन स्वाइन फ्लुया त्रास न्यना वनाच्वंसां स्वास्थ्यकर्मीतय्सं धाःसा परीक्षण याःगु मदुनि ।
कञ्चनपुर जिल्ला जनस्वास्थ्य कार्यालयया प्रमुख शिवदत्त भट्टं स्वाइन फ्लुया बारे थःपिंत जानकारी मदु धासें कुंवरया स्वास्थ्य परीक्षणया निंतिं स्वास्थ्यकर्मीत छ्वयेगु खँ धाःगु दु। भारतय् आपालं मनूत स्वाइन फ्लुं कयाः सीगुलिं नेपालय् नं उकिया लिच्वः लाये फइगु आशंका जुयाच्वंगु दु ।
