राष्ट्रपतियात कुलबहादुरया द्वपं
येँ (सन्ध्या टाइम्स)/ माओवादी सरकारं प्रधान सेनापति जुल धकाः पौ समेत बीधुंकाः नं राष्ट्रपतिया कारणं उगु पदय् बहाल जुइमखंम्ह अवकाश प्राप्त रथी कुल बहादुर खड्कां थःत प्रधान सेनापति मदयेकेगु राष्ट्रपतिया पलाः गैरसंवैधानिक हे खः धयादीगु दु। नेपाली सेनाय् वय्कः स्वयां सिनियर प्रधान सेनापति रुक्मांगद कटवालयात अवकास बियाः वय्कः स्वयां जुनियर छत्रमान गुरुङयात न्हूम्ह प्रधानसेनापति नियुक्त याःगु सन्दर्भय् वय्कलं थ्व खँ धयादीगु खः ।
निर्वाचित सरकारं थःत प्रधानसेनापति नियुक्तिया पौ समेत बीधुंकाः राष्ट्रपतिं उकियात बदर यायेगु ज्या संविधानया अःखः जूगु बिचाः वय्कलं प्वंकादीगु दु। राष्ट्रपतिया पलाःयात कयाः वय्कलं खुल्ला रुपं न्ववानादीगु थ्वहे न्हापांखुसी खः।
लिसें वय्कलं सेना दुने नं पार्टीतय्सं थाय् दयेकेत स्वयाच्वंगुलिं सेना सतर्क जुइ माःगु बिचाः नं प्वंकादीगु दु।
