'ईलय् हे संविधान निर्माण मजुसाः गम्भीर दुर्घटना'
नेकपा (एमाले)या अध्यक्ष झलनाथ खनालं ईलय् हे संविधान निर्माण मजूसाः देश गम्भीर दुर्घटनाय् लाइगु खँ धयादीगु दु ।
झापाया विर्तामोडय् शुक्रवाः संचारकर्मीत नाप खँल्हाबंला यानादिसें अध्यक्ष खनालं देय् इतिहासया हे महत्वपूर्ण घडीलय् न्ह्या वनाच्वंगु धयादिसें गुलाः दुने संविधान निर्माण यायेगु ज्या पू मवंसाः भयावह दुर्घटना जुइगु ख्याच्वः बियादिल ।
वयेकलं ईलय् हे संविधान निर्माण यायेमाःगु दायित्व दक्वं प्रमुख राजनीतिक दतय्गु जूगुलिं संभावित दुर्घटना जुइमबीत दलतय्त गम्भीर जुइत इनाप यानादिल । संविधान निर्माण यायेगु ज्याय् दलत दथुइ एकता जुइमबीत देशय् दक्षिणपन्थी व उग्रवामपन्थीत लगेजुयाच्वंगु द्वपं नं वयेकलं बियादिल । वयेकलं मुख्य राजनीतिक दलत दथुइ एकता याकेत एमाले व्यवस्थापन ज्याये लगेजुयाच्वंगु धयादिल ।
एमाले अध्यक्ष खनालं देशय् संविधान निर्माण, शान्ति स्थापना, राज्या पुनसंरचना, आर्थिक रुपान्तरण व राष्ट्रिय एकता सुदृढ यायेमाःगु न्यागू मुख्य ज्या दुसां नं संविधान निर्माणयात प्राथमिकता बीमाःगु धयादिल ।
