चुनाव लिपा जक कांग्रेसं सरकार त्वःति : पौडेल
नेपाली कांग्रेसया संसदीय दलया नेता रामचन्द्र पौडेलं थ्व सरकारया नेतृतवय् न्हूगु संविधान निर्माण व संसदीय चुनाव मयाकूतल्ले कांग्रेस सरकारय् च्वनाच्वनीगु खँ धयादीगु दु ।
शुक्रवाः विराटनगर विमानस्थलय् पत्रकारत नाप खँल्हाबंला यानादिसें वयेकलं धयादिल, - 'थ्व सरकारयात हे मेगू निर्वाचन तक यंकेगु कांग्रेसया योजना दु । माओवादी नेतृत्वया सरकारया छुं सम्भावना मदु ।'
माओवादीं स्वन्ति लिपा माओवादी नेतृत्वया सरकार गठन जुइगु धकाः धयाच्वंगु दुनि धकाः पत्रकारतय्सं न्यंगु न्ह्यसःलय् वयेकलं धयादिल, - 'न्हापा मोहनी वलय् क्वदली धाल, आः स्वन्ति । लिपाः घ्य:चाकू संल्हू धाइ अले चथा ।' वयेकलं सरकार क्वदालीगु माओवादीया चर्चा केवल गफ जक जूगु टिप्पणी यानादिल ।<
अथेहे पार्टी विवाद बारे न्यंगु न्ह्यसःया लिस बियादिसें नेता पौडेलं पार्टीया महासमितिया बैठक सारे यायेगु पक्षय् केन्द्रिय समिति मदुगु धयादिल । वयेकलं पार्टी सभापति गिरिजाप्रसाद कोइरालां महासमितिया बैठक स्थगित यायेत सुझाव ब्यूसां केन्द्रिय समिति उगु पक्षय् मदुगु धयादिल ।
