सभाध्यक्ष नेम्वाङयात फ्रान्सया संविधान
फ्रान्सया सभासदतय्सं थौं संविधानसभाया नायः सुवास नेम्वाङयात नेपालीं अनुवाद यानातःगु फ्रान्सया संविधान लःल्हाःगु दु ।
फ्रान्सया राष्ट्रपतिय प्रणाली व अनया संवैधानिक व्यवस्थाया वारे नेपालया संविधान निमार्णया झ्वलय् चर्चा जुयाच्वंगु इलय् फ्रान्सेली सभासदतय्सं नायः नेम्वाङयात अनया संविधान लःल्हाःगु खः । उगु हे झ्वलय् वय्कःपिंसं नेपालय् आः जुयाच्वंगु संविधान निमार्णय् जूगु प्रगति व सहमति जुइ ल्यं दुगु विषयया बारे सभाध्यक्ष समक्ष जिज्ञासा तःगु खः । वय्कःपिंसं व्यवस्थापिका संसद अवरोधं संविधान निमार्ण प्रकृयाय् लाःगु असरया बारे जिज्ञासा तःगु खँ सभाध्यक्ष सुवास नेम्वाङं जानकारी बियादिल ।
नेम्वाङं आः तक व्यवस्थापिका अवरोधं संविधान निमार्णय् असर मलाःगु धासें वइगु दिंसं दलत थुगु विषयलय् गम्भीर जुइगु आशा प्वंकादीगु खः । नापं सभाध्यक्ष नेम्वाङं अवरुद्ध व्यवस्थापिका संसद चायेकेत प्रधानमन्त्री व माओवादी नेतातय्त थःम्हं इनाप यानागु धयादिल ।
प्रान्सेली सभासद यभोन कोलिन सिमोन सुटोर लगायतया पुचलं नेम्वाङया कार्यकक्ष सिंहदरवारय् फ्रान्सेली संविधान लःल्हाःगु खः ।
