आन्दोलनयात दमन यानाः राष्ट्रपति शासन लादय् यायेगु कुत: : प्रकाश
एकीकृत नेकपा (माओवादी)या न्वकु नारायणकाजी श्रेष्ठ 'प्रकाशं' माओवादीं न्ह्याकूगु आन्दोलनयात दमन यानाः राष्ट्रपति शासन लादय् यायेगु व शान्ति प्रक्रिया स्यंकेगु नापं संविधानसभा विघटन यायेगु षडयन्त्र जुयाच्वंगु खँ धयादीगु दु ।
थौं पोखराय् संयुक्त राष्ट्रिय जनआन्दोलन नेपाल तमुवान राज्य समितिया ग्वसालय् जूगु विशाल सभायात सम्बोधन यासें शान्ति प्रक्रिया स्यंकेगु व संविधानसभा विघटन यायेगु षडयन्त्रयात आम जनताया संघर्षपाखें परास्त यायेगु ख्याच्वः बियादिल ।
माओवादीयात याकः याना, धम्की बियाः आत्मसमर्पण याकेत स्वःगु धासें माओवादी संविधानसभा दलया उपनेता समेत जुयाच्वनादिम्ह श्रेष्ठं राष्ट्रिय स्वाधिनता सेना समायोजन सहितया शान्ति प्रक्रिया व संघीय गणतन्त्रात्मक राज्यव्यवस्थाया निंतिं सुं लिसे नं आत्मसमर्पण मयायेगु स्पष्ट यानादिल । वय्कलं राष्ट्रपतिया पला: नागरिक सर्वोच्चता विरोधी जक मजूसे राष्ट्रिय स्वाधीनतालिसे स्वानाच्वंगु न्ह्यथनादिसें राष्ट्रपतिया असंवैधानिक पलया विरोध यायेत देशभक्त, वामपन्थी व सच्चा गणतन्त्रवादी शक्तितय्गु ब्वतिइ माओवादीया नेतृत्वय् न्हूगु संयुक्त राष्ट्रिय सरकार गठन यायेगु उद्घोष समेत यानादिल ।
शान्ति प्रक्रिया व न्हूगु संविधान निर्माण जुइमबिकेत षडयन्त्र जुयाच्वंगु धासें नेता प्रकाशं धयादिल, - 'सल्लाह यानाः मिलय् जुइसा ठिक जू मखुसा: बल प्रयोग यायेगु खःसा अथे यायेत नं माओवादी तयार दु ।'
माओवादी नेतातय्त जेल तयेमाःगु धइगु काँग्रेस नेताया धापूप्रति कडा आपत्ति प्वंकूसें वय्कलं आः नं माओवादीयात याकः यायेगु, सहमति व सहकार्य मयायेगु खःसा संसदवादी राजनीतिक दलतय्त हे नेपाली जनताया बलय् जेलया ख्वाउँगु छिडींइ तयेगु ख्याच्वः बियादीगु खः ।
