बस दुर्घटनाय् न्याम्ह सित, ३५ बेपत्ता
येँ (सन्ध्या टाइम्स)/सिन्धुपाल्चोकया जलविरें येँपाखे वयाच्वंगु छगः बस सुनकोशी खुसिं कुतुवनाः न्याम्ह सीगु दुसा ३५ म्ह बेपत्ता जुयाच्वंगु दु ।
थौं सुथय् जलविरें येँपाखे वयाच्वंगु बा. १ ख २६२८ नम्बरया बस १० बजेपाखे कदमबास गाविसया भैंसे धाःगु थासय् सतक स्वयां २५ मिटर क्वय् कुतुं वंगु खः। बसय् खुइम्ह ति यात्रु दुगु अनुमान दु। बसया यात्रुत मध्ये खुम्हेसित जीवित हे उद्धार याःगु दु ।
स्थानीय प्रत्यक्षदर्शीतय्सं धाः कथं कुतुं वंगु बसया च्याम्ह झिम्ह ति यात्रुतय्त खुसिं चुइका यंकूगु दुसा स्वम्ह यात्रु लाल कयाः बचे जुइत ताःलाःगु खः। गम्भीर रुपं घाःपाः जूपिं उमित वासः यायेत येँय् हःगु दु ।
सीपिं मध्ये प्यम्ह मिजं व छम्ह मिसा खःसां निम्हेसिया सनाखत जूगु दु। सीपिं निम्ह यामबहादुर थापा व सरोज नेपाल खःसा मेपिं स्वम्हेसिया सनाखत मजूनि ।
बेपत्ता जुयाच्वंपिंत मालेत स्थानीय जनता, जनपद प्रहरी व सशस्त्र प्रहरीं घटनास्थलय् कुतः यानाच्वंगु दु ।
वा वयाच्वंगुलिं खुसिया सतह अप्वयाच्वंगु दु गुकिं यानाः मनूतय् अवस्था छु गथे धकाः सीके फयाच्वंगु मदु व थुकिं उद्धारय् नं समस्या जुयाच्वंगु दु ।
