कतारय् स्वाइन फ्लुं नेपाःमि सित
येँ (सन्ध्या टाइम्स)/ कतारय् ज्या याइम्ह छम्ह नेपाःमि स्वाइन फ्लु ल्वचं कयाः सीगु दु। रौतहत नर्कटीया - २ या पीदँ दुम्ह शेख हरुन स्वाइन फ्लु ल्वचं कयाः स्वन्हु न्ह्यः सीगु खः। अनया सुप्रिम काउन्सिल अफ हेल्थ व पब्लिक डेपार्टमेन्टं थुकिया पुष्टि याःगु दु ।
हरुनया मृत्यु बारे छ्वयाहःगु रिपोर्टय् एन वन नाइन वान निमोनिया (सिभर एच वन एन वन निमोनिया विथ एआरडीएसं) सीगु खँ न्ह्यथनातःगु दु ।
दोहास्थित नेपाली दूतावासयात स्वाइन फ्लुं कयाः हरुन मदुगु खबर बुधवाः थ्यंगु खः ।
कतारय हे ज्या यानाच्वंम्ह हरुनया कायचा शेख साद्र आलमया कथं हरुनयात वंगु भदौ ४ गते सामान्य ज्वर वःगु खःसा वयां झिंन्हय्न्हु लिपा व सीगु खः। हरुन म्हं मफुगु निन्हु लिपा सामान्य वासः पसलं न्याना हःगु वासः नःगु खःसा उगु वासलं ल्वय् मलनेवं वयात अलखोरस्थित हमाद अस्पतालय् जाँचे याकूगु खः। अनया वासः स्वन्हु तक नयाः नं मजिसेंलि हाकनं अस्पतालय् यंकूगु खः तर भर्ना जूगुया न्हय्न्हु लिपा हरुन मन्त ।
च्यादँ न्ह्यवंनिसें कतारय् ज्या यानाच्वंम्ह हरुनया कलाः व स्वम्ह काय दु ।
