नेप्से सामान्य सुधार
येँ (सन्ध्या टाइम्स)/छन्हु न्ह्यः नविल बैंकया शेयरय् उच्च रुपं भाः कुहां वयाः गाक्कं कुहां वंगु नेप्से परिसूचक म्हिगः छुं भचा सुधार जूगु दुसा मेखे म्हिगः स्टायण्डर्ड चार्टर्ड बैंकया शेयरय् भाः कुहां वःगु दु। स्टायण्डर्डया शेयर भाः नविलया थें उच्च रुपं कुहां मवःसां नेप्सेय् धाःसा लिच्वः लाकल।
वाणिज्य समुह अन्तर्गत स्वंगू जक बैंकया शेयर भाः थहां वंगु दुसा मेगु दक्वं बैंकया कारोबार कुहां वःगु दु। उकी मध्ये नं स्टायण्डर्डया दकलय् अप्वः २५५/- तका कुहां वःगु दुसा थ्व धुंकाः एसबीआई बैंकया शेयरय् प्रति कित्ता ८५/ तका कुहां वल। नेप्सेय् वयाच्वंगु लगातारया र्हासया कारणं म्हिगः नं नेप्से ९ दशमलव ७२ अंकं कुहां वयाः ६२० दशमलव ३९ अंकय् थ्यंगु दु। अथे हे सेन्सेटिभ २ दशमलव ८५ अंकं व फ्लोट नं शून्य दशमलव ९५ अंकं कुहा वल ।
छन्हु न्ह्यः उच्च रुपं कुहां वःगु नविलया शेयरय् म्हिगः सामान्य सुधार जुयाः २८/- तका दां थहां वन। अथे हे बागेश्वरी डेभलपमेण्ट व विजनेश डेभलपमेण्टया शेयरय् वःगु र्हासया कारणं विकास बैंक समुह नं कुहां वंगु दु ।
कारोबार जूगु उपसूचकय् दकलय् अप्वः जलविद्युत समुह १७ दशमलव २३ अंकं कुहां वयाः ८३५ दशमलव ६८ अंकय् थ्यन। थ्व धुंकाः वाणिज्य समुह १३ दशमलव ५८ अंकं कुहां वयाः ६१२ दशमलव ७३ अंकय् थ्यंगु दु। विकास बैंक समुह ५ दशमलव शून्य ३ अंकं कुहां वयाः ६७४ दशमलव ७२ अंकय् व फाइनान्स समुह ३ दशमलव ४४ अंकं कुहां वयाः ६४२ दशमलव ३३ अंकय् थ्यंगु दु। उखे म्हिगःया कारोबारय् विमा समुह छगू जक १ दशमलव ९ अंकं सामान्य थहां वनाः ६३० दशमलव ७४ अंक थ्यन ।
उखे नेप्से कुहां वंसां म्हिगःया शेयर संख्या व दांया कारोबार धाःसा थहां वंगु दु। म्हिगः नं ख्वीछगू कम्पनीया शेयर कारोबार जूगु दुसा मुक्कं छगू लाख चय्न्हय्गू प्यसः व न्यय्प्यंगू कित्ता शेयर न्याये-मी जुयाः गुंगू करोड स्वंगू लाख व गुइखुद्वः तका दांया कारोबार जुल। अथे हे पीन्यागूया कम्पनीया कारोबार कुहां वंगु दुसा हाकनं छक्वः म्हिगः नेशनल हाइड्रो पावरया दकलय् अप्वः ४५,४०० कित्ता शेयर न्याये-मी जूगु दुसा स्टायण्डर्ड फाइनान्सया ४२,६४३ कित्ता शेयर न्याय-मी जुल। स्टायण्डर्ड फाइनान्सं दांया ल्याखं दकलय् अप्वः छगू करोड चय्न्यागू लाख व न्हय्द्वः तकाया कारोबार याःगु दु। मेखे कारोबार जूगु कम्पनीत मध्ये कुबेर मर्चेण्ट बैंकं अप्वः कमे याःगु दुसा बागेश्वरी विकास बैंकं अप्वः गुमे याःगु दु ।
