भारतीय लगानीकर्तातय्त प्रधानमन्त्रीया आश्वासन
भारतीय राजदूत सूदं नं प्रधानमन्त्री नापयात
भारतीय उद्यमी व्यवसायीतय्सं नेपालय् स्थिरता व सुरक्षा दुसाः लगानी यायेत तयार दुगु खँ धाःगु दु । नेपाल उद्योग वाणिज्य महासंघया ब्वनाय् बुधवाः नेपाः वपिं भारतीय उद्योग परिसंघ (सीआईआई)या प्रतिनिधिमण्डलं बिहीवाः सुथय् प्रधानमन्त्री माधवकुमार नेपाल नाप नापलाना सहलह यायेगु झ्वलय् थ्व खँ धा:गु खः ।
प्रधानमन्त्रीयात नापलायेगु झ्वलय् भारतीय लगानीकर्तातय्सं नेपाःया लगानी सुरक्षा कानुनया बारे च्यूताः प्वंकूगु व नीतिगत स्थिरताय् ध्यान बीत इनाप याःगु खः ।
उगु झ्वलय् प्रधानमन्त्री नेपालं लगानी सहितया विषयलय् छगू हे तहं स्वइगु उच्चस्तरिय संयन्त्र निर्माण यायेगु व शान्ति सुरक्षा सुदृढ यायेत एकीकृत सुरक्षा योजना लागु यायेगु विषयलय् भारतीय लगानीकर्तातय्त आश्वासन बियादिल ।
थ्वस्वयां न्ह्यः भारतीय राजदूत राकेश सुदं प्रधानमन्त्री नेपालयात बिहीवाः सुथय् नापलाना पशुपतिलय् भारतीय पूजारीयात याःगु आक्रमणया बारे भारतीय विदेश मन्त्रालयं प्वंकूगु च्यूता बारे जानकारी याकादीगु खः । प्रधानमन्त्री निवास बालुवाटारय् जूगु खँल्हाबंलाय् राजदुत सूदं प्रधानमन्त्रीया चीन भ्रमण बारे नं च्यूता प्वंकादीगु खः ।
