पार्टी दुने विभाजन दु : कोइराला
नेपाली कांग्रेसया कार्यवहाक सभापति सुशील कोइरालां विभाजित निगू कांग्रेस छप्पं जुया न्ह्या वनेधुंकूसां भावनात्मक एकीकरण जुइमफुगु खँ धयादीगु दु ।
कांग्रेस संगठन सुदृढिकरण अभियान अन्तर्गत पोखराय् जूगु पश्चिमाञ्चल स्तरीय अन्तर सम्वाद ज्याझ्वया बिहीवाः उल्लेज्या यानादिसें पार्टी दुने थीथी कथंया विभाजन कायम हे जूगु खँ स्वीकार यानादीगु खः ।
वयेकलं कांग्रेसया झिंनिक्वःगु महाधिवेशनं नेतृत्व परिवर्तन जुइगु धयादिसें वयेकलं महाधिवेशनं पार्टीया नेतृत्व न्हूपिंत लःल्हाइगु धयादिल । वयेकलं ल्याम्हतय्त कांग्रेसया नेतृत्व कायेत तयार जुइत नं इनाप यानादिल । वयेकलं प्रजातन्त्रया रक्षक कांग्रेस दुने हे प्रजातान्त्रिक अभ्यासया अभाव जूगु धयादिसें थंज्याःगु कमी कमजोरीयात चीकेमाःगु बिचाः प्वंकादिल ।
अथेहे छुं न्हि न्ह्यः माओवादी अध्यक्ष पुष्पकमल दाहाल 'प्रचण्डं' जनताया ल्हातय् ल्वाभः वसाः जक नागरिक सर्वोच्चता कायम जुइ धका: धयादीगु धापू प्रति आपत्ति प्वंकादिल । वयेकलं जनताया ल्हातय् ल्वाभः वसाः नागरिक सर्वोच्चता मखसें गृहयुद्ध व तानाशाह जन्म जुइ धयादिल ।
पश्चिमाञ्चलया न्यय्न्याम्ह अगुवा कार्यकर्तातय् ब्वति दुगु ज्याझ्वलय् कांग्रेस संसदीय दलया नेता रामचन्द्र पौडेल, केन्द्रीय दुजःत डा. रामशरण महत, चक्र बास्तोला, डा. मनमोहन भट्टराई व नेता विश्वप्रकाश शर्मा थीथी प्यंगू कार्यपत्र प्रस्तुत याइगु ज्याझ्वः दु ।
