माओवादी हे समस्याया जड : ओली
नेकपा (एमाले)या नेता केपी शर्मा ओलीं माओवादी हे समस्या जड जूगु टिप्पणी यानदीगु दु ।
बुटवलय् जारी एमालेया लुम्बिनी अञ्चल कार्यकर्ता प्रशिक्षण ज्याझ्वया निंतिं बुटवल थ्यंकादिम्ह ओलीं प्रेस चौतारी रुपन्देहीं याःगु पत्रकार सम्मेलनय् वयेकलं संविधान निर्माण जुइमबीगु, शान्ति प्रकृयायात न्ह्येमबीगु, न्यायालययात मनेमयाइगु, राष्ट्रपतियात विवादय् सलिगु, संसदं गठन जूगु सरकार माने मायेसें माओवदीं समस्या खडा यानाच्वंगु द्वपं बियादिल ।
वयेकलं संविधान निर्माण व शान्ति प्रकृया तार्किक निष्कर्ष मथ्यंसाः उकी दकलय् तःधंगु घाटा माओवादीयात हे जुइगु बिचाः प्वंकादिल । अथेहे वयेकलं माओवादीं धाथें थ्व सरकार याकनं क्वमदलीगु दाबी यानादिसें वर्तमान सरकारं हे संविधान निर्माण व शान्ति प्रकृयायात निष्कर्षय् थ्यंकीगु धयादिल ।
उपराष्ट्रपति परमानन्द झाया सपथ प्रकरणया बारे नेता ओलीं थःगु मां भाय् हे मखुसां सहे मसःगु हिन्दी भासं बलजफ्दी सपथ काःगु ज्यां थः अचम्म जूगु टिप्पणी यानादिल । वयेकलं थीथी पदया निंतिं तःक्वःहे खँय भासं सपथ कायेधुंकूम्ह झां आः वयाः खँय भाय मसः धाःगु धापू प्रति आपत्ति प्वंकादिल ।
