भारतया न्हूम्ह विदेश सचिव नेपाः वयइगु

भारतया न्हूम्ह विदेश सचिव निरुपमा राव नेपाःया निन्हुन्यंकया भ्रमणया निंतिं सोमवाः येँय् वइगु जूगु दु ।

वंगु साउन १६ गते निति थःगु पदभार ग्रहण यानादिम्ह रावं नेपाः भ्रमणया झ्वलय् राष्ट्रपति डा. रामवराण यादव, प्रधानमन्त्री माधवकुमार नेपाल, परराष्ट्रमन्त्री सुजाता कोइराला, परराष्ट्र सचिव ज्ञानचन्द्र अचार्य सहित नेपाःया उच्च अधिकारी व थीथी राजनीतिक दलया नेतातय् नापलानादीगु ज्याझ्वः दु ।

विदेश सचिव रावया भ्रमणय् नेपाःया शान्ति प्रकृया, न्हूगु संविधान निर्माण, सेना समायोजन लगायत समसामयिक विषयलय् नेपाःया अधिकारीत नाप खँल्हाबंला जुइगु खँ दु । अथेहे प्रधानमन्त्री माधवकुमार नेपालया भारत भ्रमण व उकीया कार्यान्वयनया पक्षया बारे नं खँल्हाबंला जुइगु ज्याझ्वः दु ।