संविधानसभाया कार्यतालीका हानं परिवर्तन
संविधानसभाया थीथी समितिं ईलय् हे अवधारण पौ लःमल्हायेवं संविधान निर्माणया कार्यतालीका बुधवाः खुक्वःगु पटक परिवर्तन याःगु दु ।
बुधवाः च्वंगु संविधानसभाया बैठकय् अध्यक्ष सुवासचन्द्र नेम्वाङं संशोधित कार्यतालिका सार्वजनिक यानादीगु खः । संशोधित कार्यतालिकाय् संविधान जारी यायेगु ई वइगु जेठ १४ गतेयात यथावत तयाः आन्तरिक तलिका जक परिवर्तन याःगु खः ।
राज्य पुनसंरचना व राज्य शक्तिया बाडँफाड समिति, प्राकृतिक श्रोत, आर्थिक अधिकार व राजश्व बाँडफाँड लगायत न्यागू समितिं प्रारम्भिक मस्यौदा व अवधारण पौ ईलय् हे तयार यायेमफुगु कारणं कार्यतालिकाय् हेरफेर यायेमाःगु खः ।
न्हूगु कार्यतालिका कथं कार्त्तिकया दुने विषयगत समितिया अवधारण सहितया मस्यौदाय् सहलह यायेगु व सुझाव निर्देशन सहित पारित यानाः संवैधानिक समितिलय् छ्वयेगु खँ न्ह्यथंनातःगु दु । अथेहे मंसीर दुने संवैधानिक समितिं दक्वं अवधारण पौ संकलन यानाः संविधानया न्हापांगु मस्यौदा तयार यायेगु व उकीया छवाःया दुने उकीयात अन्तिम रुप बिया राय सुझावया निंतिं प्रशासन यायेगु खं संशाधित कार्यतालिकाय् न्ह्यथंनातःगु दु ।
अथेहे पुस १५ गते तक जनातया राय सुझाव व कार्ययोजना संकलन यायेगु, माग १५ गते तक संवैधानिक समितिया न्हापांगु मस्यौदाय् सुझाव कायेगु व सुनुवाई यायेगु व फागुन दुने विस्तृत प्रतिवेदन लःल्हायेगु व चैत ३ गते तक विधेयक संविधानसभाय् पेश यायेगु ज्याझ्वः क्वछिनातःगु दु ।
थ्वस्वयां न्ह्यः वंगु पुस १४ व २२, चैता ३१म वैशाख १६ व साउन १ गते यानाः न्याक्वः तक संविधान सभाया कार्यतालिका संशोधन यायेधुंकूगु दु ।
