नेपाली सेनाया मापदण्ड माने यायेम्वाः : बोगटी
नागरिक सर्वोच्चता कायम मजुतल्ले सेना समायोजन जुइफइमखु
एकीकृत नेकपा (माओवादी)या संसदीय दलया प्रमुख सचेतक पोष्टबहादुर बोगटीं जनमुक्ति सेनां थःगु मापदण्ड पूवंकेधुंकूगुलिं नेपाली सेनाया मापदण्ड माने यायेम्वाःगु खँ धयादीगु दु ।
संयुक्त राष्ट्रिय जनआन्दोलन समितिं बुधवाः दाङया घोराहीलय् याःगु जनसभाय् वयेकलं थःगु हे मापदण्ड पूवंकाः जनमुक्ति सेनां भर्ना काःगु धयादिसें सेना समायोजनया झ्वलय् नेपाली सेनां दयेकूगु मापदण्ड पूवंके म्वाः धयादिल ।
नेता बोगटीं एमाले व कांग्रेसं आः तक नं न्हूगु संविधानया खाका न्ह्यब्वेमफुगू धयादिसें थुकीं संविधान सभायात एजेण्डा विहीन यानाः संविधान निर्माण ईलय हे निर्माण यायेमबीगु षडयन्त्र यानाच्वंगु द्वपं बियादिल ।
अथेहे सभाय् माओवादी नेता जनार्दन शर्मा 'प्रभाकरं' थःपिनि आन्दोलन युद्धया निंतिं मजूसें शान्तिया निंतिं जूगु प्रष्ट यानादिल । वयेकलं देयात हानं युद्ध पाखे यंकेगु षडयन्त्र जुयाच्वंगु धयादिसें माओवादी युद्धय् मवंसें न्हूगु संविधान निर्माण व शान्ति प्रकृयायात निष्कर्षय् थ्यंकीगु प्रतिबद्धता प्वंकादिल ।
अथेहे बुधवाः झापाया विर्तामोडय् संचाकर्मीत नाप खँल्हाबंला यानादिसें माओवादीया महासचिव रामबहादुर थापा 'बादलं' नागरिक सर्वोच्चता कायम मजूतल्ले सेना समायोजन व शान्ति प्रकृया यात निष्कर्षय् थ्यंके फुइमखु धयादिल । वयेकलं थुकीया निंतिं राष्ट्रिय सरकारया आवश्यकता जूगु धयादिसें वर्तमान सरकारं थुपिं निगूलिं ज्या यायेमफइगु दाबी यानादिल ।
