आत्मनिर्णयया अधिकारय् बबाल
येँ (सन्ध्या टाइम्स)/ म्हिगः च्वंगु राज्य पुनर्संरचना समितिया बैठकय् संघीय व्यवस्थाय् आत्म निर्णयया अधिकार बीगु लाकि मबीगु धइगु खँयात कयाः तःधंगु बबाल जुल ।
आत्मनिर्णयया अधिकार धायेबलय् प्रदेशत छुटे जुया वनीगु समेत अधिकार जूगुलिं थज्याःगु अधिकार बी मजिउ धकाः मेगु पार्टीतय्सं धाःगु खःसां माओवादीया सभासद्तय्सं छुटे जुया वनेगु अधिकार बीवं तुं धाथें छुटे जुया वनी मखु, उकिं थ्व अधिकार नं बीमाः धकाः तर्क तःगु खः। प्रदेशतय्त छुटे जुया वनेगु अधिकार दइ मखु धइगु वाक्यांश नं तयेमाः धकाः मेगु दलतय्सं तःगु प्रस्तावयात माओवादी सभासद्तय्सं कडा रुपं विरोध याःगु खः। उमिसं कानूनय् कलाः-भाःत छुटे जुइ दु धकाः अधिकार बियातःसां फुक्कं कलाः-भाःत छुटे जुयाच्वंगु मदु, अथे हे प्रदेशत छुटे जुइ दु धायेवं फुक्कं छुटे जुइ मखु, बरु थज्याःगु अधिकारं केन्द्रं उमित दमन यायेगु ज्या याये फइ मखु धकाः तर्क तःगु खः।
माओवादी सभासद्तय्सं तःगु थ्व अडानया कारणं म्हिगः थुकिया बारे निर्णय याये मफुगु खँ धाःगु दु ।
